არქივი - ოქტომბერი 2008

მომწვანო-მოოქროსფერო ღვინოა, თაფლისა და ბანანის ტონებით. მოტკბო, ე.წ. მომრგვალებული გემოთი, დაბალი მჟავიანობით, კარგად დაბალანსებული.

შილდასა და ყვარლის მიკროზონებში დაკრეფილი საფერავიდან დაწურული ღვინოა. ინტენსიური მუქი ლალისფერია. სასიამოვნო, მწიფე ხილის სურნელი აქვს, გამოარჩევს მწიფე ალუბლის, ლეღვის, შავი კენკრის, თუთის, შავი ზეთისხილის ტონები. გემოზე სასიამოვნოდ მწკლარტეა, ღვინო ახალია და შესაძლოა ჯერ კიდევ წინა აქვს პიკი. დეკანტირებაც არ აწყენდა.

კარგი იქნება ნიგვზიან ლობიოსთან, ვაზის ფოთლის ტოლმასთან, ჩანახთან, მწყერთან.

მალხაზ ხარბედია

© „მარანი“

დაწურულია წინანდალის მიკროზონაში მოწეული ნარჩევი ყურძნიდან. ღია ჩალისფერი, ძალზე მდიდარი ღვინოა, სასიამოვნო ბუკეტითა და ძლიერი გემური ნიშნებით. სურნელში გამოირჩევა მცენარეული, ატმის, ეკზოტიკური ხილისა და მცირეოდენი მინერალური ტონები. საკმაოდ დაბალანსებული ღვინოა, მიუხედავად თავდაპირველი სიხისტისა გემოში, ღვინის დაბოლოება სირბილით ხასიათდება.