პორტუგალიის მოწინავე ღვინის კომპანია Sogrape-მ საკუთარი წარმოების ღვინის ერთ-ერთი ძირითადი სახეობისთვის მეტალის ხრახნიანი თავსახურები გამოიყენა. ღვინო Quinta de Azevedo Vinho Verde 2010 ხასიათდება, როგორც ,,ცოცხალი, ენერგიული ღვინო სასიამოვნო მჟავიანობითა და მსუბუქი შუშხუნით” და ქსელში ათ დოლარად იყიდება.
ეს თამამი გადაწყვეტილება, ცოტა არ იყოს, უცნაურადაც მოჩანს, თუ გავითვალისწინებთ იმ ფაქტს, რომ დღესდღეობით პორტუგალია ნატურალური კორპის მსხვილი მწარმოებელია. მსოფლიოში წარმოებული კორპის 50% სწორედ პორტუგალიაზე მოდის, ამ ქვეყანაში კორპის დასამზადებლად საჭირო მუხის ჯიშის კორომები 720 000 ჰექტარზეა გადაჭიმული.
კორპის საცობების მოხმარება უკანასკნელი ათი წლის განმავლობაში განუხრელად კლებულობს. 2009 წელს, საერთო ჯამში, 18 მილიარდი ცალი ბუნებრივი საცობი გაიყიდა, ანუ მსოფლიო მასშტაბით გამოყენებული საცობების საერთო რაოდენობის მხოლოდ 69% იყო კორპისა. მეტალის თავსახურების წილმა 11%, ხოლო პლასტიკატისამ – 20% შეადგინა.
შედარებისთვის, ათი წლის წინ ღვინის ბოთლების 95%-ს ბუნებრივი საცობი ჰქონდა. პორტუგალიის ნატურალური საცობის მწარმოებელთა ასოციაციის წარმომადგენელების თქმით, ის ფაქტი, რომ თვით პორტუგალიელმა მეღვინეებმა დაიწყეს მეტალის საცობების გამოყენება, ბევრს არაფერს ნიშნავს და ამ სფეროში არსებულ სურათს ძირეულად ვერ ცვლის.
© ღვინის კლუბი/Weekend
ბეჭდვა
თქვენი კომენტარი