მანჰეტენის სასამართლოს ნაფიცმა მსაჯულებმა ასეთი განაჩენი გამოიტანეს – ინტერნეტ-მაგნატ ერიკ გრინბერგს დაეკისროს ჯარიმა 12 მილიონი დოლარის ოდენობით, რადგან მან მილიარდერ უილიამ კოჰს 24 ბოთლი ფალსიფიცირებული ღვინო მიჰყიდა. კოჰის ადვოკატმა ჯონ ჰიუსტონმა ჟურნალისტებს განუცხადა, რომ ორივე მხარემ იურიდიულ მომსახურებაზე 5-5 მილიონი დოლარი დახარჯა. ბატონმა კოჰმა საქმის აღძვრისთანავე 10 მილიონი დოლარი მოითხოვა და განაცხადა, რომ მიღებული თანხით ჩამოაყალიბებს ფონდს, რომელიც მასავით მოტყუებულ ადამიანებს დაეხმარება. მან ისიც აღნიშნა, რომ, სამწუხაროდ, ასეთ თაღლითობაზე არავინ საუბრობს, მას კი სურს, რეალობა გამოააშკარაოს. მოპასუხე მხარე განაჩენით მეტად იმედგაცრუებული დარჩა. ბატონი გრინბერგის თქმით, მან თავადაც არ იცოდა, რომ გასაყიდად გატანილი ღვინო ფალსიფიცირებული იყო, ამიტომ, თავდაპირველად, კოჰს კომპენსაციის გადახდაც კი შესთავაზა, მაგრამ მილიარდერმა ამ წინადადებაზე უარი განაცხადა და მოწინააღმდეგეს 12 მილიონის გადახდა მოსთხოვა.
© ღვინის კლუბი/Weekend
ბეჭდვა
თქვენი კომენტარი