ალბათ გასაკვირი არ უნდა იყოს, რომ იმ ევროპელ მკვლევართა შორის, რომლებიც საქართველოში XIX საუკუნის მანძილზე მოგზაურობდნენ, ყველაზე მეტად სწორედ ფრანგები დაინტერესდნენ ქართული ვაზისა და ღვინის კულტურის შესწავლით. ამას მოწმობს საფრანგეთის მუზეუმებსა და არქივებში დაცული მასალები: ფოტოები, ეთნოგრაფიული ჩანაწერები და ექსპედიციების ანგარიშები. ამ მასალების მიხედვით 1850-იან წლებში საქართველოდან საფრანგეთში ადგილობრივი ვაზის ნიმუშებიც კი გაიგზავნა მათი შესწავლის, და ვინ იცის, იქნებ მათი მომავალი გაშენების მიზნითაც.
რას მოგვითხრობენ საფრანგეთში დაცული არქივები და ფოტოები ქართული ღვინის კულტურის შესახებ და რა იზიდავდა ფრანგებს ღვინის დაყენების ქართულ ტრადიციებში - ეს იყო ძირითადი ხაზი იმ ფოტოგამოფენისა, რომელიც მიმდინარე წლის 28 აპრილს, პარიზში, ვაზისა და ღვინის საერთაშორისო ორგანიზაციაში გაიმართა Images de la viniculture géorgienne au XIXe siècle (მე-19 საუკუნის ფრანგულ ფოტოებში ასახული ქართული ღვინის კულტურა). გამოფენა ჩატარდა ქართული ღვინოების დეგუსტაციის პარალელურად, რომელიც უკვე მესამე წელია პარიზში ღვინის ეროვნული სააგენტოსა და საფრანგეთში საქართველოს საელჩოს ორგანიზებით ეწყობა.
წარმოდგენილი იყო ორი ფრანგი მკვლევრის, ჟოზეფ ბერტელო ბარონ დე ბაის (1853-1931) და ჰუგო კრაფტის (1853-1935) მიერ საქართველოში 1896-1903 წლებში გადაღებული ფოტოები, რომლებსაც თან ერთვოდა ავტორების ეთნოგრაფიული ჩანაწერები. ფოტოებზე ასახულია ვაზისა და ღვინის კულტურასთან დაკავშირებული სხვადასხვა ასპექტები. აქ არის რთველი, ღვინის დაწურვა, ღვინის მნიშვნელობა სადღესასაწაულო სუფრაზე, ასევე ბაზრის სცენები, სადაც ჩანს გასაყიდად გამოტანილი ღვინით გაბერილი ტიკები, თიხის სხვადასხვა საღვინე ჭურჭელი, ქვევრები და ა.შ. ფოტოებს შორის ალბათ განსაკუთრებით უნდა აღინიშნოს დავით სარაჯიშვილის ფოტო–პორტრეტი, რომელიც მისსავე დიღმის ვენახშია გადაღებული 1897-1903 წლებს შორის.
ქართველ დამთვალიერებელს გამოფენის ნახვა თბილისში ივნისის თვეში შეეძლება.
ანა ჭეიშვილი
კულტურული მემკვიდრეობის კურატორი
© საქართველოს ღვინის კლუბი, ღვინის ეროვნული სააგენტო.
ბეჭდვა
თქვენი კომენტარი