თევზის გუფთები სოუსით

საჭირო მასალა: 400 გ თეთრი თევზის ფილე, 2 თავი ხახვი, 1 ცალი კვერცხი, 2 ნაჭერი თეთრი პური, 1 ცალი კარტოფილი, მარილი, თეთრი და შავი პილპილი – გემოვნებით, საფანელი – ამოსავლებად, ზეთი – შესაწვავად.

სოუსისთვის – 1 კგ თავისივე წვენში დაკონსერვებული პამიდორი, 1 დიდი თავი ხახვი, 1 პატარა კონა ქონდარი, 3 კბილი ნიორი, 1 ჩ.კ. თავშავა, მწიკვი შაქარი,  2 ს.კ. ზეთი, მარილი, პილპილი – გემოვნებით.

მომზადება: პური დავალბოთ წყალში და გავწუროთ. თევზის ფილე, ხახვი, კარტოფილი და პური ხორცსაკეპ მანქანაში გავატაროთ, შევურიოთ კვერცხი, სანელებლები და დავყოთ პატარა ბურთულებად. ამოვავლოთ საფანელში და ბლომად ზეთში შევწვათ.

პამიდორი ავთქვიფოთ ბლენდერში, დავუმატოთ დაჭყლეტილი ნიორი, თავშავა, მარილი, პილპილი და წამოვადუღოთ. ხახვი რგოლებად დავჭრათ, მოვაყაროთ შაქარი და ზეთში მსუბუქად მოვშუშოთ. პამიდვრის სოუსში ჩავაწყოთ გუფთები, მოვაყაროთ მოშუშული ხახვი და მოვრთოთ ქონდრის ყლორტებით.

© ღვინის კლუბი/Weekend