სახელმწიფო სუბსიდია გლეხებს

კახეთში რთველი აქტიურ ფაზაში შევიდა. როგორც რეგიონში საქართველოს პრეზიდენტის სახელმწიფო რწმუნებულმა გიორგი ღვინიაშვილმა განაცხადა, კახეთში უკვე 1000 ტონაზე მეტი ყურძენია გადამუშავებული და ყურძენი სასურსათო დანიშნულებითაც იყიდება.
გუბერნატორის ინფორმაციით, ამჟამად კახეთში ღვინოს 9 ქარხანა იბარებს, თუმცა ახლო მომავალში მათი რაოდენობა 34–მდე გაიზრდება. რაც შეეხება ყურძნის შესასყიდ ფასებს, ღვინიაშვილის განცხადებით, ფასები მოსავლის ხარისხის მიხედვით განისაზღვრება, შავი ყურძენი კილოგრამი დაახლოებით 40–50 თეთრი ღირს, ხოლო თეთრის ფასი 30–დან 35 თეთრამდე მერყეობს.
როგორც გუბერნატორმა აღნიშნა, დაწყებულია გლეხებისთვის სახელმწიფო სუბსიდიების გაცემაც და გლეხები ჩაბარებული ყურძნის ხარისხის მიუხედავად ერთ კილოგრამ თეთრ ყურძენზე სახელმწიფოსგან დამატებით 15, ხოლო შავ ყურძენზე 25 თეთრს იღებენ. სახელმწიფო სუბსიდიის მიღება გლეხებს ყურძნის ჩაბარებიდან 3 დღეში, `სახალხო ბანკის` ნებისმიერ ფილიალში შეუძლიათ.

რადიო `კომერსანტი`