რუსები სომხურ კონიაკს აღარ წყალობენ

სომხური კონიაკისთვის ტრადიციული რუსული ბაზარი ბოლო დროს სულ უფრო ნაკლებად ინტერესდება ამ პროდუქტით. 2010 წელს სომხური კონიაკის გაყიდვები რუსეთში 20%-ით, ხოლო მსოფლიო მასშტაბით 26%-ით შემცირდა. ამის შესახებ საინფორმაციო სააგენტო REGNUM–ს ერევნის კონიაკის ქარხანა ,,არარატის” დირექტორმა არა გრიგორიანმა განუცხადა. თუკი შევადარებთ კრიზისამდელ, 2008 წლის მონაცემებსა და 2010 წლის პირველი ხუთი თვის გაყიდვების შედეგებს, ნათელი გახდება, რომ კონიაკის რეალიზაციამ 55%-ით იკლო, - ამბობს გრიგორიანი, თუმცა იქვე ხაზს უსვამს იმ გარემოებას, რომ ადგილობრივი სამომხმარებლო ბაზარი თანდათანობით ფეხზე დგება და დღეს სომხეთში, რუსეთისა და უკრაინისგან განსხვავებით, უწინდელზე მეტი კონიაკი იყიდება. ორ უდიდეს ბაზარზე – რუსეთსა და უკრაინაში პროდუქტის რეალიზაციის კლებას გრიგორიანი იმით ხსნის, რომ მომხმარებელი ხარისხიან და, შესაბამისად, ძვირადღირებულ კონიაკს ხშირად იაფფასიანსა და უხარისხოს ამჯობინებს. საგულისხმოა, რომ სომხური წარმოების პროდუქტის გაყიდვების მაჩვენებელმა არა ძვირფასი, არამედ სამვარსკვლავიანი კონიაკების სეგმენტში იკლო.