პანკის დედოფალი – ვისკის დიზაინერი

ლეგენდარულმა ბრიტანელმა დიზაინერმა, პანკის დედოფლად წოდებულმა ვივიენ ვესტვუდმა ამჯერად შოტლანდიური ვისკის – 18 წლიანი დაძველების Chivas Regal –ის დიზაინზე იზრუნა. სასმელის ახალი ,,ტანსაცმელი” მან ლონდონის მოდის კვირეულზე, სამოსის კოლექციასთან ერთად წარადგინა. ვისკის ეს პარტია შეზღუდული რაოდენობით გადის ბაზარზე, მისი მხოლოდ 2500 ბოთლია ჩამოსხმული. თითო ბოთლის ფასი 495 დოლარი იქნება და ავტრალიაში, ბელგიაში, ჩინეთში, გერმანიაში, იაპონიასა და სხვა ქვეყნებში გაიყიდება. ბოთლის დიზაინში ვესტვუდმა დიდი ბრიტანეთის დროშის ფერები და საპატიო ორდენის ანალოგი გამოიყენა. ,,მე ინგლისელი ვარ და ჩემს შემოქმედებაში არ შემიძლია გვერდი ავუარო ბრიტანულ თემატიკას”, - განაცხადა მან.

კომპანიისთვის ეს დიზაინერთან თანამშრომლობის პირველი მცდელობა არ არის, Chivas Regal –ის დიზაინზე, თავის დროზე, გამოჩენილი მეტრები: ალექსანდრ მაქქუინი და კრისტიან ლაკრუა მუშაობდნენ და ბრწყინვალე ნამუშევრებიც შექმნეს.

© ღვინის კლუბი/Weekend