ენოტურიზმი ესპანეთში

ესპანეთში ჯერ კიდევ ეკონომიკური კრიზისი მძვინვარებს, ამიტომ სახელმწიფო ძირითად აქცენტს ტურიზმის ერთ-ერთი მიმართულების - ენოტურიზმის განვითარებაზე აკეთებს. ღვინის მწარმოებელი ქალაქების ესპანური ასოციაციის (ACEVIN) ექსპერტებმა სტატისტიკური მონაცემები გამოაქვეყნეს: ყოველწლიურად 1,5 მილიონი ადამიანი სწორედ ენოტურიზმს ირჩევს გართობისა და დასვენების საუკეთესო საშუალებად. ასოციაციის თანამშრომლები განმარტავენ, რომ ტურისტებს მხოლოდ ღვინის დაწურვისა და დეგუსტაციის პროცესის ყურება კი არ ხიბლავთ, ვენახების დათვალიერებითაც დიდ სიამოვნებას იღებენ – ასე ხომ ისინი უკეთ ეცნობიან ესპანეთის უმშვენიერეს ბუნებას, სადაც ვაზი ყველაზე თვალწარმტაც ადგილებშია გაშენებული. ანალიტიკოსთა გამოკვლევებმა ცხადყო, რომ დაახლოებით 15 მილიონი ესპანელი ერთხელ მაინც სწვევია ცნობილი მარკის ღვინის მარანს. ესპანური ღვინო ბევრი უცხოელისთვისაც ძალიან საინტერესოა და რაც მთავარია, ეს ინტერესი წლიდან წლამდე უფრო და უფრო იზრდება. ენოტურიზმის განვითარებით ქვეყანაში 50 ათასი ახალი სამუშაო ადგილი შეიქმნება. ესპანეთში ჩასულ ტურისტებს ყველაზე მეტად მეღვინეობით განთქმული სამი რეგიონი ხიბლავთ: ხერესი (ხერეს-დე-ლა-ფრონტერა), კატალონია და რიოხა.

© ღვინის კლუბი/Weekend