2018 წლის 3-6 მაისს ქვევრის ღვინის საერთაშორისო კონკურსი ასოციაცია ქართული ღვინოს ინიციატივითა და ორგანიზებით, საქართველოს სოფლის მეურნეობის სამინისტროს, ღვინის ეროვნული სააგენტოს მხარდაჭერით, უკვე მეორედ ჩატარდება.
შეგახსენებთ, რომ ქვევრის ღვინის საერთაშორისო კონკურსი საქართველოში პირველად 2017 წელს ჩატარდა და 150 ღვინის ნიმუშიდან 22-მა ოქროს, 20-მა ვერცხლის და 29-მ ბრინჯაოს მედალი დაიმსახურა.
კონკურსის მიზანი მსოფლიოსთვის ქართული და უცხოური საუკეთესო ქვევრის ღვინოების წარდგენა, ქვევრის ღვინის წარმოების და მოხმარების ხელშეწყობა და სხვადასხვა ქვეყანაში წარმოებული ქვევრის ღვინის ცნობადობის ამაღლებაა.
ქვევრის ღვინის საერთაშორისო კონკურსში მონაწილეობა შეუძლიათ ქვევრის ღვინის მწარმოებლებს, მსოფლიოს ნებისმიერი ქვეყნიდან და რეგიონიდან. საკონკურსო ნიმუშებს გასინჯავს ქართველი და უცხოელი ექსპერტებისგან შემდგარი ჟიური.
კონკურსში მონაწილე შეიძლება იყოს ღვინის საწარმო, ინდივიდუალური მეღვინე, კოოპერატივი, ან მეღვინეთა გაერთიანება.
კომპანიამ თუ კერძო პირმა ნიმუშები შემდეგი სახით უნდა წარადგინოს: ღვინო უნდა იყოს დაყენებული ქვევრში ღვინის დაყენების ტექნოლოგიის წესების დაცვით. ღვინო უნდა იყოს გასაყიდად ბოთლში ჩამოსხმული. წარდგენილი ღვინის მინიმალური რაოდენობა არ უნდა იყოს 400 ბოთლზე ნაკლები. ბოთლის ეტიკეტი უნდა მოიცავდეს შემდეგ ინფორმაციას: მწარმოებელი კომპანიის სრული დასახელება, ღვინის დასახელება, ჩამოსხმის წელი, ყურძნის ჯიში, რეგიონი/ქვეყანა და მოცულობა. წარდგენილი უნდა იყოს ერთი დასახელების ღვინის 3 ნიმუში (ბოთლი= 0.75ლ). ნიმუშების წარდგენის ბოლო ვადაა 25 აპრილი.
სრული ინფორმაცია კონკურსის შესახებ იხილეთ ბმულზე:
http://www.gwa.ge/upload/file/ქვევრის_ღვინის_საერთაშორისო_კონკურსი_20182.pdf
სარეგისტრაციო ფორმა:
http://www.gwa.ge/upload/file/სარეგისტრაციო_ფორმა_-_ქვევრის_ღვინის_საერთაშორისო_კონკურსი_2018.docx
© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი
ბეჭდვა
თქვენი კომენტარი