უნგრელი მეღვინე, რომელმაც გადაწყვიტა, ქურდებისათვის ჭკუა ესწავლებინა, შესაძლოა თავად აღმოჩნდეს ბრალდებულის სკამზე.
როგორც უნგრელი სამართალდამცავები იუწყებიან, მეღვინეს ბრალი ედება მკვლელობაში. მის გაუთვალისწინებელ საქციელს ერთი ადამიანის სიცოცხლე შეეწირა, ხუთი კი საავადმყოფოში მოხვდა. თავად მეღვინემ კი განაცხადა, რომ ის არავის მოკვლას არ აპირებდა. მისი მარნიდან, რომელიც ბუდაპეშტიდან 50 კილომეტრში მდებარეობს, დაუდგენელი პირები დროდადრო ღვინოს იპარავდნენ. ამიტომ მეღვინემ გადაწყვიტა, ქურდებისათვის ჭკუა ესწავლებინა და მათ მოსაწამლად ღვინოში ანტიფრიზი გაურია. როგორც გაირკვა, 24 ოქტომბერს 30 წლის ახალგაზრდამ მეღვინის მარნიდან რამდენიმე ლიტრი ღვინო “ისესხა” და მეგობრებსაც გაუმასპინძლდა. რამდენიმე დღის შემდეგ კი ძლიერი მოწამვლის დიაგნოზით ის საავადმყოფოში მოხვდა და 1 ნოემბერს იქვე გარდაიცვალა. თუმცა, გარდაცვალების ზუსტი მიზეზი ჯერ კიდევ უცნობია. საავადმყოფოში იმყოფება გარდაცვლილის ხუთივე მეგობარი, რომელთაც მოწამვლის იგივე სიმპტომები აქვთ, რაც მათ მასპინძელს აღენიშნებოდა.
© ღვინის კლუბი/Weekend
ბეჭდვა
თქვენი კომენტარი