გამოქვეყნებულია: 23 მარტი, 2009 - 23:49
29-31 მარტს გერმანიაში ღვინისა და ალკოჰოლური სასმელების საერთაშორისო გამოფენა - ProWein გაიმართება, რომელშიც ტრადიციულად ქართველებიც მიიღებენ მონაწილეობას. ეს არის მსოფლიოში ერთ-ერთი უდიდესი ღვინის დღესასწაული, რომელსაც დიუსელდორფი მასპინძლობს. გამოფენაზე თავს იყრიან საკეთესო ღვინის კომპანიები, ენოლოგები და ამ სფეროს ექსპერტები. ის ფაქტი, რომ გამოფენა ბიზნესზეა ორიენტირებული, მის მნიშვნელობას კიდევ უფრო ზრდის.
საქართველო ProWein-ზე უკვე მეცხრე წელია მონაწილეობს. 2007 წლამდე იქ ცალკეული კომპანიები მიემგზავრებოდნენ, შარშანწინ კი პირველად წარვდექით ზოგადად ქართული ღვინის სახელით. სხვა ქვეყნების მსგავსად, მოეწყო ჩვენი სტენდი, რომელმაც დიდი ინტერესი გამოიწვია.
წლევანდელ ProWein-ზე ქართული დელეგაციის ხელმძღვანელი სოფლის მეურნეობის სამინისტრო იქნება, სტენდს კი ტენდერში გამარჯვებული კომპანია
CTPA დაამზადებს. გამოფენაში 16 ქართული კომპანია მიიღებს მონაწილეობას. ერთ-ერთია "თბილღვინო," რომელსაც გერმანიაში რამდენიმე სამარკო პროდუქტი მიაქვს, მათ შორის, თეთრი მშრალი "წინანდალი" და წითელი მშრალი "საფერავი" - "თბილღვინოს" კოლექციიდან, ასევე, "მუკუზანი", "წინანდალი" და "საფერავი" - "თბილღვინოს განსაკუთრებული მარაგიდან," რომლებიც მუხის კასრებში რამდენიმე თვის განმავლობაში ძველდება. "თბილღვინოს" წარმომადგენლების თქმით, მათთვის დიდი პატივია ასეთ გამოფენაში მონაწილეობა და იმედოვნებენ, რომ ProWein ქართული ღვინის კომპანიებისთვის საუკეთესოდ ჩაივლის.
© მადიანი/vinoge.com
ბეჭდვა
თქვენი კომენტარი