– როდის გადაწყვიტეთ მარნის დაარსება და რა იყო ამის მიზეზი?
– 2015 წელს გადავწყვიტეთ ჩამოგვესხა ღვინო ბოთლებში. მანამდე ღვინოს შიდა საოჯახო მოხმარებისთვის ვამზადებდით, მაგრამ რომ გაიზარდა მოთხოვნა ხარისხიან და კარგ ღვინოზე, ჩვენც გადავწყვიტეთ ჩამოსხმა და ბაზარზე გამოტანა.
– ვაზის რომელი ჯიშები გაქვთ გაშენებული და კიდევ რომელ ჯიშებზე აპირებთ ყურადღების გამახვილებას?
– გაშენებული გვაქვს უსახელაურის და ცოლიკაურის ჯიშის ვაზები და ამ ეტაპზე სხვა ჯიშებზე ყურადღების გამახვილებას არ ვგეგმავთ.
– რა ღვინოებს აწარმოებთ და რითაა გამორჩეული თქვენი ღვინო?
– ჩვენ ვაწარმოებთ 2 სახის ღვინოს - უსახელაურს და სამანდარიოს ცოლიკაურს. ორივე გამოირჩევა თავისი განსაკუთრებულობით, იწარმოება შეზღუდული რაოდენობით და ორივე ნახევრადტკბილია.
– გაიხსენეთ საქართველოში ღვინის გაყიდვის თქვენი პირველი გამოცდილება, რომელ მაღაზიებთან გქონდათ ურთიერთობა?
– პირველად ჩვენი ღვინო შევიტანეთ „ღვინის გალერეაში“ (წინამძღვრიშვილის 39-ში) და გაგარინზე მდებარე ღვინის მაღაზიაში.
– გადის თუ არა თქვენი ღვინო უცხოეთის ბაზარზე?
– ვცდილობთ გავიტანოთ უცხოეთის ბაზარზე, მაგრამ ჯერ-ჯერობით დიდი წარმატებები არ გვაქვს.
– რა სახის სირთულეები შეგხვედრიათ თქვენს საქმიანობაში? რა უნდა დაიხვეწოს ყველაზე მეტად ღვინის სფეროში?
– ჩვენი აზრით, სახელმწიფო მეტად უნდა უწყობდეს ხელს მცირე მეწარმეებს ქვეყნის გარეთ მათი ღვინის რეკლამირებასა და ექსპორტში; ამ ეტაპზე, ჩვენი ღვინის პოპულარიზაცია ქვეყნის გარეთ საერთოდ არ ხდება. სახელმწიფო არ გამოყოფს ამაზე არანაირ სახსრებს. ასევე არ ხდება ღვინის ხარისხის და ადგილწარმოშობის ღვინის რაოდენობის კონტროლი.
– თქვენი აზრით, რა არის ყველაზე მნიშვნელოვანი ფაქტორები თანამედროვე ქართული ღვინის კულტურის განვითარებისთვის?
– სახელმწიფომ ხელი უნდა შეუწყოს ღვინის მრავალფეროვნებას და უნდა შეიზღუდოს ისეთი მასიური ჯიშების გაშენება, როგორიცაა რქაწითელი და ა.შ. უნდა გადავიდეთ ძველი უნიკალური ჯიშების აღდგენაზე-წარმოებაზე. ქართული ღვინის ძველთაგანვე არსებული მრავალფეროვნება უნდა გახდეს ჩვენი ღვინის კულტურის განვითარების მთავარი ფაქტორი.
– რას ურჩევდით დამწყებ მევენახე–მეღვინეებს?
– აქცენტირება გააკეთონ იშვიათ ჯიშების ვენახისა და ღვინის წარმოებაზე.
მარნის დასახელება: შპს ოყურეშის მარანი
მარნის მისამართი: ლეჩხუმი, ცაგერის რაიონი, სოფ. ოყურეში
ტელეფონი: +995 599244141; +995 591548445
ელფოსტა: okureshismarani@yahoo.com
ვებ/ფეისბუკ გვერდი: Okureshi Wine-cellar
© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი
ბეჭდვა
თქვენი კომენტარი