WineWeekend მასშტაბური ღვინის სადეგუსტაციო ღონისძიებაა, რომელიც ნიდერლანდების სამეფოს ქალაქ რეისვეიკში (Rijswijk) ყოველწლიურად ტარდება. წელს გამოფენაში 50-მდე ღვინის კომპანიამ მიიღო მონაწილეობა. WineWeekend-ზე სპეციალური სტენდი Taste of Georgia ქართულ ღვინოებს დაეთმო.
ღვინის ეროვნული სააგენტოს მხარდაჭერით, გამოფენაზე წარმოდგენილი იყო ქართული ღვინის მწარმოებელი 6 კომპანიის 12 სახეობის ღვინო. ეს კომპანიებია „კონჭო და კომპანი“, „თბილღვინო“, „ფაფარი ველი“, „ბაგრატიონი 1882“, „ბექა გოცაძის საგვარეულო მარანი“ და „თელავის ღვინის მარანი“.
WineWeekend-ის ფარგლებში ორი პრეზენტაცია-სემინარი გაიმართა - ,,ქარვისფერი ღვინოები საქართველოდან’’, რომელსაც ღვინის პროფესიონალები დაესწრნენ. დეგუსტაციას ღვინის ეროვნული სააგენტოს კონტრაქტორი კომპანია Saperavi Wine Agency-ის დირექტორი ბერნარდ ნაუტა უძღვებოდა.
ღვინის მოხმარების საერთაშორისო ტენდენციებსა და სტატისტიკაზე დაყრდნობით, ნიდერლანდების ბაზარი ქართული ღვინის ექსპორტისთვის საკმაოდ პერსპექტიულია. ჰოლანდიელი პროფესიონალები დაინტერესებულნი არიან ქართული ღვინოებით, რის საფუძველზეც, ღვინის ეროვნულმა სააგენტომ 2017 წელს ხელშეკრულება გააფორმა ღვინის იმპორტიორ კომპანიასთან Saperavi Wine Agency, რომელიც ნიდერლანდებში ქართული ღვინის იმპორტს ახორციელებს და ქართული ღვინის ცნობადობის გაზრდის მიზნით სხვადასხვა ღონისძიებას მართავს.
© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი
ბეჭდვა
თქვენი კომენტარი