ჟურნალ “მადიანის” სარედაქციო ჯგუფის განცხადება

ჟურნალ “მადიანის” სარედაქციო ჯგუფსა და ერთ-ერთ დამფუძნებელს, მამუკა ჩიხლაძეს შორის მომხდარი უთანხმოების გამო, რაც გამოიხატებოდა თანამშრომლებთან ხელშეკრულებებით გათვალისწინებული პირობების დარღვევაში, ჩვენ, ჟურნალ “მადიანის” გუნდმა ივნისის თვეში მიზანშეწონილად მივიჩნიეთ დროებით საერთოდ უარი გვეთქვა ერთ-ერთ დამფუძნებელთან, მამუკა ჩიხლაძესთან თანამშრომლობაზე და კატეგორიულად ავუკრძალეთ ჩვენი ტექსტური თუ ფოტო მასალების გამოყენება საქმის ვითარებაში გარკვევამდე. მიუხედავად ამისა, მან ბოროტად გამოიყენა შექმნილი სიტუაცია და ავტორების სურვილის საწინააღმდეგოდ, ხელშეკრულებით გათვალისწინებული შეთანხმებების დარღვევით, მიითვისა და ჟურნალის მეორე ნომერში დაბეჭდა ის მასალები, რომელიც ბოლო ორი თვის განმავლობაში მოამზადა სარედაქციო ჯგუფმა. გამომცემლების ნაწილმა და ჟურნალის რედაქციის წევრებმა არაერთხელ გააფრთხილეს მამუკა ჩიხლაძე, რომ ჯგუფი უარს აცხადებდა თავიანთი მასალების გამოქვეყნებაზე, მაგრამ ამის მიუხედავად, მან ერთპიროვნულად მიიღო გადაწყვეტილება და მაინც დაბეჭდა ჟურნალი.