ჩემი მარანი

შილდასა და ყვარლის მიკროზონებში დაკრეფილი საფერავიდან დაწურული ღვინოა. ინტენსიური მუქი ლალისფერია. სასიამოვნო, მწიფე ხილის სურნელი აქვს, გამოარჩევს მწიფე ალუბლის, ლეღვის, შავი კენკრის, თუთის, შავი ზეთისხილის ტონები. გემოზე სასიამოვნოდ მწკლარტეა, ღვინო ახალია და შესაძლოა ჯერ კიდევ წინა აქვს პიკი. დეკანტირებაც არ აწყენდა.

კარგი იქნება ნიგვზიან ლობიოსთან, ვაზის ფოთლის ტოლმასთან, ჩანახთან, მწყერთან.

მალხაზ ხარბედია

© „მარანი“

დაწურულია წინანდალის მიკროზონაში მოწეული ნარჩევი ყურძნიდან. ღია ჩალისფერი, ძალზე მდიდარი ღვინოა, სასიამოვნო ბუკეტითა და ძლიერი გემური ნიშნებით. სურნელში გამოირჩევა მცენარეული, ატმის, ეკზოტიკური ხილისა და მცირეოდენი მინერალური ტონები. საკმაოდ დაბალანსებული ღვინოა, მიუხედავად თავდაპირველი სიხისტისა გემოში, ღვინის დაბოლოება სირბილით ხასიათდება.

ღვინო ყვარლის ზონაში გაშენებულ ვენახებში, სიმწიფის პიკზე დაკრეფილი საფერავის ჯიშის ყურძნიდან იწურება. კლერტის გაცლით წურავენ და შემდეგ მხოლოდ 2 დღის განმავლობაში ტოვებენ ჭაჭასთან შეხებაში (მაცერაცია). დუღილი კონტროლირებად ტემპერატურაზე მიმდინარეობს, რის შემდეგაც ძველდება ფრანგული მუხის კასრებში.

ძოწისფერი ღვინოა, გამჭვირვალე, ფერში სიძველის ნიშნებით. საკმაოდ სხეულიანია, გემოზე მწკლარტე. აშკარად იგრძნობა წითელი კენკრის ტონები, თუმცა სურნელებში საშუალო სიმწიფის მაყვალი ჭარბობს. პირველ გასინჯვაზე ახალგაზრდა ღვინის შთაბეჭდილებას ტოვებს, თავიდან სპირტუოზულობაც იგრძნობა, თუმცა, ღვინის ფერი საპირისპიროზე მეტყველებს.

დაწურულია სოფელ მაღრაანში, ტყისპირებზე მოყვანილი ქისის ჯიშის ყურძნიდან კახური ტექნოლოგიით. ერთ-ერთი საუკეთესო კახური ტიპის ღვინოა, რომელიც კი გამისინჯია. მუქი ქარვისფერია, ნათელი სხივებით. ძალზე მდიდარი ბუკეტი აქვს, თვალახვეულს შესაძლოა წითელ ღვინოშიც აგერიოს.