გუფთა არაბულად

საჭირო მასალა: 800 გ საქონლის ძვლიანი ხორცი, 1,5 ჭიქა მოხარშული მუხუდო, 3 თავი ხახვი, 2 ს.კ. ტომატ-პასტა, 1 ჩ.კ. პაპრიკა, 2 ჩ.კ. ხმელი პიტნა, 0,3 ჭიქა ზეთი, 1 კონა ქინძი, მარილი – გემოვნებით. გუფთისთვის -  1 1/4 ჭიქა წითელი ბულგური, 3 ს.კ. მანანის ბურღული, 250 გ ცხვრის ან საქონლის ხორცის ფარში, 1 თავი ხახვი, 0,5 ჩ.კ. პაპრიკა, 6-8 ს.კ. წყალი, მარილი, შავი პილპილი – გემოვნებით.

მომზადება: ძვლები ჩავაწყოთ ქვაბში, დავასხათ წყალი და ხარშვისას მომდგარი ქაფი მოვხადოთ. დავუმატოთ მარილი და განვაგრძოთ ხარშვა. დაგვჭირდება 6 ჭიქა ბულიონი. ბულგური გავრეცხოთ, შევურიოთ ხორცის ფარში, მანანის ბურღული, წვრილად დაკეპილი ხახვი, მარილი, პაპრიკა და პილპილი. ფარშს ვურიოთ და თან წყალი ვამატოთ. ფარში წყლით ძალიან არ გავათხელოთ. გავაკეთოთ კაკლისოდენა ბურთულები. ბურთულები მოვხარშოთ ადუღებულ მარილწყალში და თუშფალანგზე გადავიტანოთ.

ღრმა ტაფაში ჩავასხათ ზეთი, დავუმატოთ ალყა-ალყა დაჭრილი ხახვი და მოვშუშოთ. შევურიოთ ტომატ-პასტა, პაპრიკა, პიტნა, მუხუდო და 6 ჭიქა ბულიონი. ტაფას დავახუროთ სახურავი და 2-3 წუთი ვხარშოთ. ბულიონში მოვათავსოთ გუფთები და კერძი კიდევ 1-2 წუთი გავაჩეროთ ცეცხლზე. სუფრასთან მიტანის წინ მოვაყაროთ დაჭრილი ქინძი. გარნირად შეგვიძლია მივირთვათ მოხარშული ბრინჯი ან ბულგური.

© ღვინის კლუბი/Weekend