ჭყინტი ყველი

კვეთი: პეპსინი გავხსნათ ოთახის ტემპერატურის 200 გრ-მდე (1 ჩაის ჭიქა) რძეში

 

რძე გადავწუროთ წვრილბადიან საცერზე, ჩავასხათ არაემალირებულ ჭურჭელში და შევათბოთ. (რძე არ უნდა ადუღდეს, უნდა შეთბეს დაახლოებით 30 გრადუსამდე). თბილ რძეში ჩავუშვათ კვეთი, კარგად მოვურიოთ და თბილ ადგილას დავდგათ 20-30 წუთით, შეიძლება ქურაზევე დავტოვოთ. ქვაბი შევდგათ ძალიან დაბალ ცეცხლზე და აჭრილი რძის მასა ხელით ფრთხილად მოვაგროვოთ ჭურჭლის ერთ კიდეში. 5 წუთში მასა მთლიან გუნდად შეიკვრება. ოდნავ მოვწუროთ, ზედმეტი სითხე რომ გამოვადინოთ. ამის შემდეგ შეგვიძლია ჯამში გადავიტანოთ. ყველი უცბად მოიყენებს სითხეს, რომელიც შეგვიძლია გადმოვწუროთ ჯამიდან (ამ პროცესის თავიდან ასაცილებლად სასურველია გამოიყენოთ თუშფალანგი). ჭყინტი ყველი თბილ ადგილას შევინახოთ 24 საათის განმავლობაში. ამ პერიოდში ყველი ფორებს გაიკეთებს და მზადაა მოხმარებისთვის ან შემდგომი დამუშავებისათვის.