გამოქვეყნებულია: 17 სექტემბერი, 2008 - 22:27
წელს პირველად ქართული ყურძენი ექსპორტზე შესაძლოა უკრაინასა და აზერბაიჯანში გაიგზავნოს. ამის შესახებ საქართველოს სოფლის მეურნეობის მინისტრმა ბაკურ კვეზერელმა აღნიშნა. მისი თქმით, ამჟამად აზერბაიჯანთან და უკრაინასთან მოლაპარაკებები მიმდინარეობს.
ბაკურ კვეზერელი გურჯაანში გახსნილ რთველი–2008–ის საკოორდინაციო შტაბს ხელმძღვანელობს და როგორც თავად აცხადებს კახეთში რთველი პრობლემების გარეშე მიმდინარეობს. მისი თქმით, რეგიონში რთველი აქტიურ ფაზაში შედის, ვენახების დიდ ნაწილში ყურძნის კრეფა უკვე დაწყებულია და რამდენიმე დღეში რთველში მთელი კახეთი ჩაერთვება.
რაც შეეხება რაჭას, მინისტრის განცხადებით, იქ რთველი შედარებით გვიან, თვის ბოლოს დაიწყება. წლევანდელ რთველზე საქართველოს სოფლის მეურნეობის სამინისტრო 130 ათასი ტონა ყურძნის მოსავალს ვარაუდობს.
შეგახსენებთ, რომ წლევანდელ რთველზე სახელმწიფომ 21 მილიონი ლარის სუბსიდია გამოყო. ამ თანხიდან 8,5 მილიონს გლეხები მიიღებენ, დანარჩენი კი ღვინის კომპანიებზე იაფი კრედიტის სახით გაიცემა.
რადიო `კომერსანტი`
თემა:
ბეჭდვა
თქვენი კომენტარი