ნიკო თევდორაშვილი: ღვინის კომპანიები მარკეტინგში ინვესტიციებს არ დებენ

რა უნდა შეცვალონ ღვინის ქართულმა კომპანიებმა გაყიდვების გასაზრდელად? Commersant.ge-ს მკითხველები ამ საკითხზე საკუთარ მოსაზრებას მთელი სამუშაო კვირის განმავლობაში აფიქსირებდნენ.
შედეგად, მათი ხმები ასე გადანაწილდა: "ღვინის ხარისხი უნდა გააუმჯობესონ" - 38,8%; "ფასები უნდა შეამცირონ", – 34.0%; "სარეკლამო კამპანია უნდა გაააქტიურონ" - 24.5%; "პროდუქციის დიზაინი უნდა გააუმჯობესონ" – 1.4%, "სხვა" – 1.4%.
გამოკითხვის შედეგების შეფასება მარკეტინგული კომპანია TMG Marketing-ის ხელმძღვანელს ნიკო თევდორაშვილს ვთხოვეთ. მისი თქმით, პასუხების თანმიმდევრობა ღვინის ბაზარზე არსებული პრობლემების შესაბამისია: ადგილობრივი მომხმარებლისთვის ყველაზე მნიშვნელოვანია პროდუქციის ხარისხი იმის მიუხედავად, არის თუ არა ღვინო ეტიკეტირებული.
თუმცა, ექსპერტის თქმით, მარკეტინგული კამპანიის გააქტიურება აუცილებელია, რათა უცხოელმა მომხმარებელმა იცოდეს, რატომ უნდა შეიძინოს ქართული ღვინო 8-12 ევროდ და არა მისთვის კარგად ცნობილი ჩილეს ღვინო 1,5 ევროდ; ადგილობრივი კლიენტურა კი ინფორმირებული იყოს, რით განსხვავდება სხვადასხვა კომპანიის მიერ წარმოებული ერთი და იგივე სახეობის ღვინო ერთმანეთისგან.
„მარკეტინგული კამპანიის მიზანი უნდა იყოს, უცხოელმა კლიენტურამ მიიღოს მესიჯები ქართული ღვინის ხარისხისა და ღირებულებების შესახებ. ეს კი, ცხადია, ხარჯებს მოითხოვს, რომელსაც ქართული კომპანიები არ სწევენ, რადგან ფიქრობენ, რომ მათთვის მთავარი ტექნოლოგიური მხარეა. რეალურად კი მარკეტინგი წარმოების განვითარების ისეთივე აუცილებელი კომპონენტია, როგორიც, მაგალითად, გამფილტრავი მოწყობილობა. უცხოურ ბაზრებზე ქართული ღვინის პოპულარიზაციისთვის საერთაშორისო გამოფენები ეფექტური საშუალება არ არის, რადგან ასეთ ღონისძიებებზე რიგითი მომხმარებელი არ დადის. აუცილებელია მიზნობრივ ჯგუფებზე მუშაობა,“ - აცხადებს თევდორაშვილი.
მისი თქმით, ღვინის ქართული კომპანიები მარკეტინგული აქტივობით არც ქართულ ბაზარზე გამოირჩევიან და ახალი წლის დღეების გარდა, ღვინის რეკლამები იშვიათობაა. ეს კი, მარკეტოლოგის შეფასებით, შეცდომაა, რადგან მომხმარებელი უნდა იყოს ინფორმირებული ამა თუ იმ კომპანიის პროდუქციის უპირატესობისა და ღირებულებების შესახებ.
მარკეტინგში წარმატებული ინვესტირების მაგალითად თევდორაშვილს ერთ-ერთი ქართული კომპანია მოჰყავს, რომელსაც 2001 წელს რუსულ ბაზარზე მარკეტინგული კამპანიის მხოლოდ დაგეგმვა და მომზადება 5 მილიონი დოლარი დაუჯდა. შედეგად კი, მისმა არცთუ მაღალი ხარისხის ღვინომ რუსული ბაზრის 33% დაიკავა.
ექსპერტი ქართული ღვინის ბიზნესის კიდევ ერთ ტენდენციაზე საუბრობს: კომპანიები ერთმანეთს კონკურენციას არა ღვინოსთან დაკავშირებული ღირებულებებისა და ღვინის მოხმარების კულტურის, არამედ მხოლოდ ფასების საკითხში უწევენ.მას მოყავს ერთ-ერთი კომპანიის მაგალითი, რომელიც ბაზარზე განსხვავებული სარეკლამო კამპანიით შემოვიდა და მომხმარებელს არა მხოლოდ ღვინო, არამედ ღვინოსთან დაკავშირებული ღირებულებები შესთავაზა, თუმცა მოგვიანებით ეს სტრატეგია გაურკვეველი მიზეზით შეწყვიტა.
„მარკეტინგული კამპანიის გააქტიურების შემთხვევაში ქართულ ღვინოს აქვს ყველა შანსი, მომხმარებლის სხვადასხვა სეგმენტში შევიდეს,“ - აცხადებს ნიკო თევდორაშვილი.
Commersant.ge