უჩვეულო კორპსაძრობი

ბრიტანელმა გამომგონებელმა რობ ჰიგსმა, რომელიც კორნუოლის საგრაფოს ქალაქ პენრინში ცხოვრობს, მსოფლიოში ყველაზე ძვირად ღირებული კორპსაძრობი შექმნა – მისი ფასი დაახლოებით 156,8 ათასი დოლარია. ეს ალბათ გასაკვირიც არ არის, რადგან კორპსაძრობი თვითონ ხსნის ღვინის ბოთლს და ჭიქებში მის ჩამოსხმასაც დამოუკიდებლად ,,ახერხებს”. კორპსაძრობი დანადგარი დაახლოებით ერთნახევარი მეტრი სიმაღლისაა და უამრავი ზამბარის, ჯაჭვისა და ჭანჭიკისგან შედგება. ამ დანადგარის ასაწყობად საჭირო 300-მდე დეტალი ჰიგსმა ძველმანების ბაზრობაზე შეიძინა ან სპეციალური შეკვეთით გამოაჩარხინა. ბოთლი სპეციალურ მომჭერში თავსდება, შემდეგ ბერკეტს უნდა დააწვეთ და მოწყობილობაც ამუშავდება – ბოთლი ზემოთ აიწევა და ჭიქას ღვინით გაავსებს. საინტერესოა, რომ ამ პროცედურის შემდეგ კორპის საცობი თითქმის უვნებელი რჩება და შესაძლებელია მისი ხელახლა გადამუშავება. დიზაინერული კომპანია Oneofone-ს შეფმა მარკუს ვილკინსონმა ჰიგსს 25 ცალი ასეთი მოწყობილობის დამზადების შეკვეთა მისცა. ბიზნესმენის აზრით, ასეთ კორპსაძრობებს სიამოვნებით შეიძენენ ისეთი რესტორნები და სასტუმროები, რომლებსაც კლიენტების გაოცება სურთ.

© ღვინის კლუბი/Weekend