სასმელების გამყიდველი აპარატი კლიენტს ცნობს

იაპონელმა გამომგონებლებმა JR East Water Business Company–დან შექმნეს სასმელების გასაყიდი ისეთი აპარატი, რომელსაც შეუძლია ამოიცნოს კლიენტის სახე და ამ ინფორმაციის საფუძველზე შესთავაზოს მას ესა თუ ის სასმელი.
ჭკვიანი აპარატი ადამიანის მიახლოებით ასაკსა და სქესსაც ადგენს, შესაბამისად, მამაკაცს "საუკეთესო ასაკში" ყავას შესთავაზებს, 40 წელს გადაცილებულ ქალბატონს კი - სასარგებლო მწვანე ჩაის ანტიოქსიდანტური მოქმედებით.
ერთი ასეთი ავტომატი უკვე დაამონტაჟეს ტოკიოს რკინიგზის სადგურზე, მომავალში კიდევ რამდენიმე აპარატი დაიდგმება. კომპანიის ინჟინრები დარწმუნებულნი არიან, რომ ამგვარი მოწყობილობა გაართობს მომხმარებელს, მიწოდებულ პროდუქციას კი უფრო პოპულარულს და მოთხოვნადს გახდის.
© ღვინის კლუბი/“Weekend“