ბრიტანელმა მეღვინემ და ასტრონომმა, იან ჰატჩეონმა მოიფიქრა, თუ როგორ შეეთავსებინა ერთმანეთთან თავისი ორი გატაცება - ღვინო და კოსმოსი. მის მიერ შექმნილი სასმლის, Meteorito-ს გასინჯვის შემდეგ მზის სისტემის საიდუმლოებათა წვდომას ალბათ უკეთ შეძლებთ. ჰატჩეონის ღვინო კაბერნე სოვინიონის ჯიშის ყურძნისგან მზადდება და მეტეორიტის პაწაწინა ნამსხვრევზეა დაყენებული. ეს პატარა ქვა წარმოშობით მარსსა და იუპიტერს შორის არსებული მეტეორიტული სარტყლიდანაა და მისი ასაკი დაახლოებით 4,5 მილიარდი წელია. კოსმოსური ქვა დედამიწაზე 6 ათასი წლის წინ ჩამოვარდნილა. ის ჩილეს ჩრდილოეთით, ატაკამას უდაბნოში აღმოაჩნეს. ქვის მფლობელი თავდაპირველად ამერიკელი კოლექციონერი იყო, მოგვიანებით კი ის ჰატჩეონმა შეიძინა და პრაქტიკული გამოყენებაც მოუძებნა. ჰატჩეონის ვენახები ჩილეს დედაქალაქ სანტიაგოდან ას კილომეტრში მდებარეობს. „კოსმოსური“ ღვინის წარმოება შემდეგნაირად ხდება: ყურძნის წვენი25 დღის განმავლობაში დუღს, შემდეგ მას მეტეორიტის ნამსხვრევს უმატებენ და ერთი წლის განმავლობაში ასე აჩერებენ. Meteorito-ს წარმოება 2010 წლის აპრილში დაიწყო და დღემდე დაახლოებით 10 000 ლიტრია ჩამოსხმული. ამჟამად მეტეორიტული ღვინო მხოლოდ ჩილეს ობსერვატორიაში იყიდება, თუმცა ჰატჩეონი აპირებს ღვინის ექსპორტი სხვა ქვეყნებში, მათ შორის, მშობლიურ ბრიტანეთშიც განახორციელოს. ,,როდესაც ამ ღვინოს სვამ, იმ ელემენტებსაც ეზიარები, რომლებიც მზის სისტემის ჩამოყალიბების პროცესში არსებობდა. ამ ღვინის საშუალებით ყველას შეუძლია შეეხოს კოსმოსის ნაწილს” - აცხადებს ჰატჩეონი.
© ღვინის კლუბი/Weekend
ბეჭდვა
ბათუმშიც შეიძლება მათი დაპატიჟება და მერე რომელიმე ტელე–შოუში :)
თქვენი კომენტარი