"ჯაყელების ღვინოები" – „ღვინის კლუბის“ პირველი არჩევანი

5 აგვისტოს Hadson&Hooker–ში ორი დასახელების ღვინო წარმოადგინა კომპანიამ „ჯაყელების ორგანული ვენახი და ღვინოები“. კომპანიის ხელმძღვანელმა, მალხაზ ჯაყელმა პრეზენტაციისას შეკრებილ საზოგადოებას აცნობა, რომ მისი მარანი ბიოლოგიურ მეურნეობათა ასოციაცია „ელკანას“ წევრია და რამდენიმე წელია, საგარეჯოს მუნიციპალიტეტის სოფელ ხაშმში ეკოლოგიურად სუფთა ღვინოს აწარმოებს. 2009 წლიდან მარნის პროდუქცია სერტიფიცირებულია, როგორც ორგანული, ანუ ბიოლოგიურად სუფთა პროდუქტი.

Hadson&Hooker–ში წარმოდგენილი იყო „ჯაყელების ღვინოების“ ორი ნიმუში – „საფერავი – 2008“ და „რქაწითელი–მწვანე – 2007“. საზოგადოების მოწონება ერთნაირად დაიმსახურა, როგორც ხაშმის სახელგანთქმულმა „საფერავმა“, ისე რქაწითელისა და მწვანის საუკეთესოდ დაბალანსებულმა ღვინომ. „რქაწითელი–მწვანე“ კიდევ უფრო მეტად გემრიელი იქნება, თუკი საზაფხულოდ ოპტიმალურ ტემპერატურაზე ჩააციებთ.

5 აგვისტოდან „ჯაყელების ღვინოების“ ეს ორი დასახელების ღვინო წარმოდგენილი იქნება ოთხ თბილისურ რესტორანში: Hadson&Hooker (ბელიაშვილის ქუჩა), ირლანდიური პაბი „დუბლინი“ (ახვლედიანის ქ. 8), ბრიტანული პაბი OLD LONDON (ახვლედიანის ქ. 6) და ამერიკული პაბი „ბუფალო ბილი“ (ახვლედიანის ქ.16).