Home
ქართული | English
ნოემბერი 2017
ორშსამოთხხუთპარშაბკვი
303112345
6789101112
13141516171819
20212223242526
27282930123

მულტიმედია

კომენტარები

როგორ შევინახოთ ღვინო

თავიდანვე უნდა ვთქვათ, რომ ღვინის შენახვისთვის საუკეთესო პირობები მიწისქვეშა მარანშია, მაგრამ რადგან ასეთი პირობები ყველა ღვინის მოყვარულს არ გააჩნია, შევეცდები ჩვეულებრივ, ქალაქურ პირობებს მივუსადაგო ეს თემა.
პირველ რიგში უნდა გავერკვეთ რა პერიოდით აპირებთ ღვინის შენახვას სახლში. თუკი თქვენი ღვინის მარაგი რამდენიმე კვირაზე ან თვეზეა გათვლილი, ღვინის შენახვა დიდ სირთულეს არ წარმოადგენს. ამ შემთხვევაში ყველაზე მნიშვნელოვანია, ღვინო მოარიდოთ სიცხესა და სინათლეს და რამდენადაც შესაძლებელია, გრილი ადგილი მოუძებნოთ. გაცილებით რთულია რამდენიმე წლით ღვინის შენახვა, რადგან თქვენ უკვე ნამდვილად დაგჭირდებათ კარგი სარდაფი ან სპეციალური ღვინის მაცივარი, სადაც ღვინო მომწიფდება და დაცული იქნება სიცხის, სინათლისა და რყევისგან. 
არავითარ შემთხვევაში არ შეიძლება ღვინის გადაცივება. ამ დროს სასმელში შეუქცევადი ცვლილებები მიმდინარეობს: წყალი იყინება, გამოცალკევებული ორგანული მასა კი ფსკერზე ილექება. ტემპერატურის მკვეთრი ცვლილებები ძალიან ვნებს ღვინოს. ოპტიმალური ტემპერატურა 15-16°С -ია. თუმცა უფრო მაღალი ტემპერატურაც დასაშვებია. 
იმის გარდა, რომ საჭიროა რეგულარული დაბალი ტემპერატურა, სარდაფი საკმაოდ ნოტიოც უნდა იყოს. იმ შემთხვევაში, თუ ტენიანობა დაბალია (60-80%-ზე ნაკლები), საცობი შეიძლება გამოშრეს, რაც ბოთლში ჰაერის შეპარვას და შესაბამისად, ღვინის დაჟანგვას გამოიწვევს, ამიტომ იდეალურია, თუ სარდაფში მიწის იატაკი იქნება და არა ბეტონის ან ქვის, რადგან მიწა ბუნებრივ ტენიანობას ინარჩუნებს.
მშრალ შენობაში საცობი შრება და ჰერმეტულობას კარგავს, ნესტიანში კი სოკო და ობი უჩნდება. დამღუპველია არა მხოლოდ ტემპერატურული რეჟიმის ხანგრძლივი დარღვევა (რაც უფრო ცხელა, მით სწრაფად "ბერდება" ღვინო), არამედ ტემპერატურის მცირეხნიანი ცვალებადობაც (მნიშვნელობა არა აქვს, მატებაა თუ კლება). 7 გრადუსზე მეტით რყევა საკოლექციო ღვინისთვის ნამდვილი კატასტროფაა: ე.წ. "თერმული შოკის" შემდეგ მისი შველა შეუძლებელია. ბუკეტი ნადგურდება და რჩება საშუალოსტატიკური მშრალი ღვინო, რომელიც არც ცუდია, არც კარგი, უფრო მეორადი შეიძლება ეწოდოს.
ძალზე მნიშვნელოვანია ბოთლების შენახვა ჰორიზონტალურ მდგომარეობაში. ასე ღვინო უკეთ სუნთქავს და საცობიც არ შრება.
შესაძლოა, უცნაურად მოგეჩვენოთ, მაგრამ ნებისმიერი უცხო სურნელი ადვილად აღწევს მჭიდროდ დახურულ ჭურჭელშიც კი. ამიტომ ძალზე მნიშვნელოვანია, რომ შენობა, სადაც სასმელია მოთავსებული, კარგად ნიავდებოდეს. თუ სარდაფში ღვინოსთან ერთად ბოსტნეული და ხორცი ინახება, ან ჩახუთული ჰაერია, ღვინოც შესაბამის გემოს შეიძენს, შესაძლოა, გაფუჭდეს კიდეც. აღარაფერს ვამბობ გარაჟებში ღვინის შენახვაზე, სადაც საბურავები, ბენზინი, მანქანის ზეთი და სხვ. ინახება.
კიდევ ერთი პირობაა სიბნელე. სინათლე უარყოფით ზეგავლენას ახდენს ღვინოზე.
A თაროებზე გადანაწილებისას თეთრი და ვარდისფერი ღვინოები, მათ შორის, ცქრიალაც, უკეთესია იატაკთან ახლოს მოვათავსოთ, სადაც მეტი სიგრილეა, კახური ტიპის ღვინოებს, ნახევრადტკბილსა და წითელ ღვინოებს კი შეგვიძლია თაროს შუაში ან უფრო ზემოთ მივუჩინოთ ადგილი. სიმშვიდე ერთ-ერთი უმნიშვნელოვანესი ფაქტორია. თუ თქვენი სახლის ახლოს რკინიგზა ან მეტრო გადის, ვიბრაცია სტელაჟებს შორის სპეციალური საფენით გაანეიტრალეთ.
უნდა გვახსოვდეს, რომ ღვინის რამდენიმე წლით შენახვას მხოლოდ მაშინ აქვს აზრი, თუკი ღვინოს ამის პოტენციალი გააჩნია, დაავადებული არაა და ღვინის იმ ტიპს მიეკუთვნება, რომლის დაძველებაც მიზანშეწონილია. მაგალითისთვის, არანაირი აზრი არა აქვს, დიდხანს შევინახოთ 2 ლარიანი თეთრი ჩამოსასხმელი ღვინო, ან ქინძმარაული, ხვანჭკარა და ნახევრადტკბილი ცქრიალა ღვინო. დავარგებისთვის უფრო მაღალხარისხიანი, განსაკუთრებულ ადგილებში მოწეული ყურძნიდან დაყენებული ღვინოებია კარგი – თეთრიც და წითელიც. კარგად ძველდება კახურად, ქვევრში დაყენებული ღვინო და რა თქმა უნდა, საფერავი, რომელსაც გამორჩეული პოტენციალი გააჩნია და წლების მანძილზე სულ უფრო იხვეწება და იცვლის ბუნებას. ცხადია დასაძველებელი ღვინოების რიცხვი ამ ჩამონათვალით არ ამოიწურება.
არანაკლებ პირობებს საჭიროებს სასმელი საწარმოში, მაღაზიაში თუ სადისტრიბუციო ქსელში შენახვისას. სამწუხაროდ, ყველა მწარმოებელი ფირმა ვერ იცავს პირობებს, ხშირად მიმწოდებლებიც გულგრილად ეკიდებიან ამ საქმეს, რომ აღარაფერი ვთქვათ მაღაზიებზე. წარმოიდგინეთ მყიდველის მდგომარეობა, რომელიც ერთ ბოთლში 85 ან 100 ლარს იხდის, ღვინისგან რაღაც განსაკუთრებულ შთაბეჭდილებებს მოელის და ამ დროს აღმოჩნდება, რომ ეს ღმერთების სასმელი არაფრით განხვავდება მისი მეზობლის პლასტმასის კასრში ჩაწურული ღვინისგან. ასეთ დროს ბევრი იღბალს, საკუთარ გამოუცდელობას ან ცუდ წელიწადს ადანაშაულებს, მაგრამ ისეთებიც არიან, ვინაც ყველაფერს ბედისწერას არ აბრალებს და საფუძვლიანად უღრმავდება პრობლემის არსს, სწავლობს ღვინის შენახვის პირობებს, იცის როგორი იყო ღვინო ჩამოსხმისას, ერთი წლის შემდეგ, ინტერესდება იმით, თუ როგორ დამზადდა ღვინო და ზუსტად ხვდება, რისი ბრალი შეიძლება იყოს ღვინის გაფუჭება. 
ალბათ გინახავთ ღვინის მაღაზიებში ან სუპერმარკეტებში ვერტიკალურად გამოფენილი ძვირფასი ღვინოები. ამ ვიტრინებში სინათლეცაა, სითბოც და ტენიანობაც, ერთი სიტყვით, ყველაფერი ის, რაც სასმელს არ უყვარს. თუ ამ საკითხის განხილვას მენეჯერთან შეეცდებით, შესაძლოა გიპასუხონ, რომ მათ მაღაზიაში ღვინო ისეთი სისწრაფით იყიდება, ხანგრძლივ შენახვაზე ლაპარაკიც ზედმეტია. შედარებით იაფფასიანის შემთხვევაში ეს ასეცაა, მაგრამ როცა საქმე ეხება 50-დან 100 ლარის ღირებულების და უფრო ძვირიან სასმელს, მსგავსი არგუმენტები სიმართლეს არ შეესაბამება. ასეთი ღვინოები მყიდველს საკმაოდ დიდხანს ელის. 
ერთი სიტყვით, ბევრი რამ თავად ჩვენზე, მომხმარებლებზე და ღვინის მოყვარულებზეა დამოკიდებული. თუკი ჩვენს გემოვნებას და შეძლებას ცოდნითაც გავაძლიერებთ და მწარმოებელს და გამყიდველს მეტ ყურადღებას მოვთხოვთ საკუთარი პროდუქტისადმი, დამიჯერეთ, საქმესაც ეშველება და უკმაყოფილება და იმედგაცრუებაც ნაკლებად იქნება. 
 
© მალხაზ ხარბედია / ქართული ღვინის გზამკვლევი 2012


სანამ შენახვამდე მივა საქმე, კითხვა მაქვს სანამ ღვინოს ვიყიდი. მინდა შევიძინო რამდენიმე ბოთლი მაღალი ხარისხის ღვინო, რომლებიც სამწუხაროდ ჩვეულებრივ მარკეტში აღმოვაჩინე. შესაბამისად ბოთლები ვერტიკალურად იდგნენ დიდხანს(2007 წლის ღვინოებზეა საუბარი). თუმცა ადგილი საკმაოდ დაცულია მზის სხივებიდან, ფაქტიურად მზის სხივი არ შედის იმ ტერიტორიაზე. რამდენად დიდია შანსი რომ ღვინო აღარ იყოს ისეთი, როგორიც აღწერილი აქვთ ცნობილ ექსპერტებს? პ.ს. ფორუმზე კი დავრეგისტრირდი და გავააქტიურე ექაუნთი, მაგრამ ვერ "ვპოსტავ". სანამ ბოლომდე "გავაქტიურდები", იქნებ აქ მიპასუხოს ვინმემ :)


გააჩნია "ცნობილმა ექსპერტებმა" როდის აღწერეს ეს ღვინოები. თუკი მაგ. 2009 წლის აღწერებია, იმის შემდეგ 4 წელი გავიდა და ღვინო აუცილებლად შეცვლილი იქნება, ან უკეთესობისკენ, ან უარესობისკენ :)



დიდი მადლობა გამოხმაურებისთვის :) ფორუმზე აქტივაციის შემდეგ ამას მიწერს: "დიდი მადლობა OgaiB. თქვენი რეგისტრაცია წარმატებით დასრულდა, მაგრამ ადმინისტრატორს სურს, რომ ფორუმში პოსტინგის უფლებების მინიჭებამდე ყველა ახალ ანგარიშს თავად გადახედოს. მას უკვე ეცნობა თქვენს შესახებ." იქნებ მიშველოთ და ფორუმზე უფრო ვრცლად დავწერდი რა ღვინოებზეა საუბარი ამ ღვინოებზეა საუბარი: Clos de Gat, Syrah, Sycra, 2007: Super-dark garnet towards royal purple, full-bodied and reflecting its 14 months in French oak barriques with abundant but gently mouth-coating tannins and notes of cinnamon and vanilla on the palate. Deeply aromatic, opens to reveal generous raspberries and red currants on the first attack, those yielding comfortably to plums, notes of saddle leather and a hint of green tobacco on the remarkably long finish. Caressing and elegant. Approachable on release in late autumn of 2010) but best from mid-2011-2018. Score 94. Clos de Gat, Ayalon Valley, 2007: As always, a Bordeaux blend of Cabernet Sauvignon, Merlot and Petit Verdot (60%, 30% and 10% respectively), showing full-bodied and reflecting its 18 months in new oak with gentle influences of spicy oak and abundant but soft, gently caressing tannins. Impenetrably dark garnet in color, showing black fruits on the nose, opening in the glass to reveal currant and blackberry fruits and, from mid-palate on hints of blueberries. Long and generous with tannins rising together with the fruits on the finish. Approachable now but best 2013-2019. NIS 180. Score 94. Clos de Gat, Chardonnay, 2009: As is the wont of the winemaker, fermented entirely on wild yeasts, developed in French oak for 12 months, deep gold with a distinct green tint. Deeply aromatic, the opening nose replete with lime and tangerines, showing fabulous depth of aromas and flavors that blossom in the glass as the wine opens. Round and almost thick, full-bodied but with plenty of fine acidity. On first attack naval oranges and summer fruits, those parting to make way for notes of fresh figs, spices and gently subdued oak, all in fine balance and all lingering on a super-long and near creamy finish. If this one does not call to mind a fine Burgundian Montrachet, nothing will. Approachable and fully enjoyable now but best from 2012-2016. Score 94. აღწერა და შეფასებები ისრაელის ღვინოების საუკეთესო მცოდნის აწ გარდაცვლილი დანიელ როგოვის მიერ არის გაკეთებული 2010 წელს. ესეც როგოვის შეფასებების შკალა: 96-100 Truly Great, My Highest Recommendation 90-95 Exceptional/ Excellent in Every Way, Very Highly Recommended 85-89 Good to Very Good and Recommended 80-84 Average and Not Exciting, Recommended Primarily as Entry-Level Wines 75-79 Mediocre and At Least Somewhat Faulted, Not Recommended 70-74 Drinkable But With a Major Fault and Not Recommended under 70 Seriously Faulted and Most Definitely Not Recommended


ეჰ, ჩვენ ქვევრის ღვინოებზე მიმიწვდებოდეს ხელი, არც დავიწყებდი ისრაელის ღვინოების შესწავლას :( აქეთ რომ წამოვედი მაშინ წამოვიდა ახალი ტალღა, მანამდე მარტო "ხოხბის ცრემლებს" ვიცნობდი ქვევრებიდან


აბა სცადეთ, წესით უკვე შეძლებთ ფორუმზე პოსტვას.

თქვენი კომენტარი

თქვენი ელ-ფოსტა არ გამოქვეყნდება
  • Web page addresses and e-mail addresses turn into links automatically.
  • No HTML tags allowed

More information about formatting options

By submitting this form, you accept the Mollom privacy policy.
საქართველოს ღვინის რუკა
თქვენ შეგიძლიათ დაეხმაროთ ჩვენს ბლოგს "PayPal"-ის საშუალებით.