წელს აისვაინის წარმოებასთან დაკავშირებულ პრობლემებზე ჩვენი გაზეთის წინა ნომრებშიც ვწერდით. უჩვეულოდ თბილმა ამინდებმა აისვაინის მწარმოებლები ძალზე აზარალა, მაგრამ ბოლოდროინდელმა აცივებამ კვლავ გააჩინა იმედი. არახელსაყრელი პირობების მიუხედავად, აისვაინის მცირე რაოდენობით დამზადება მაინც მოახერხეს იტალიასა და ესპანეთში. ყინვებს სიხარულით შეხვდნენ მორავიელი მეღვინეები - ჩეხეთში ტემპერატურა -13 გრადუსამდე დაეცა და მევენახეებმაც ვაზებს შეყინული უკანასკნელი მტევნები დაკრიფეს. აისვაინის წარმოება ჩეხეთში, გერმანიისა და ავსტრიისგან განსხვავებით, ტრადიციული არ არის და მხოლოდ 1995 წლიდან იწყება. ჩეხეთის მეღვინეთა ასოციაციის წარმომადგენელთა განცხადებით, 2010 წელს ქვეყანაში 16 400 ლიტრი აისვაინი ჩამოისხა. ასეთი დაგვიანებული ყინვები იქაურ უხუცესებსაც კი არ ახსოვთ - როგორც წესი, ტემპერატურა ახალი წლის დადგომამდე ეცემა ხოლმე -7 გრადუსზე დაბლა. თებერვალში დაკრეფილი ყურძნის უმცირესი მოსავალი ისედაც შეზღუდული რაოდენობით წარმოებულ აისვაინს კიდევ უფრო ძვირფასს ხდის.
© ღვინის კლუბი/Weekend
ბეჭდვა
თქვენი კომენტარი