ბრიტანეთის ღვინითა და სპირტიანი სასმელებით მოვაჭრეთა ასოციაციამ (Wine and Spirit Trade Association - WSTA) საგანგებო სახელმძღვანელო გამოუშვა მათთვის, ვისაც განზრახული აქვს, თანხები ღვინის წარმოებაში დააბანდოს. ახალი წიგნი, სახელად "ინვესტიციები ელიტურ ღვინოში" ქვესათაურით "ნუ გახდებით თაღლითობის მსხვერპლი” მკითხველს ძვირადღირებული ღვინის წარმოებაში არსებული საფრთხეებისა და რისკების შესახებ მოუთხრობს. ღვინის ინვესტორთა ერთგვარი "ბიბლია" მყიდველებს ასწავლის, პირველ რიგში, რა უნდა შეამოწმონ მანამ, სანამ კეთილშობილ სასმელში დიდძალ თანხას გადაიხდიან. ბრიტანეთის ღვინითა და სპირტიანი სასმელებით მოვაჭრეთა ასოციაციის წარმომადგენელი - გევინ პარტინგტონი ამბობს, რომ ბოლო წლებში ელიტური ღვინის შესყიდვები გაიზარდა და ბუნებრივია, მზარდმა ბაზარმა უამრავი თაღლითიც მიიზიდა - განსაკუთრებით en primeur-ის გაყიდვებზე, ანუ, ახალი ღვინის გაყიდვებზე, ჯერ კიდევ ბოთლებში ჩამოსხმამდე. სახელმძღვანელო გვირჩევს, ღვინის შეძენამდე მწარმოებელი კომპანიის ბიზნეს ისტორიით, მისამართით, ღვინის შენახვის პირობებითა და მიწოდების გარანტიით დავინტერესდეთ. აღსანიშნავია, რომ დასავლურ მედიაში გავრცელებული ინფორმაციით, მხოლოდ გასული 6 თვის განმავლობაში თაღლითებმა ფრანგ მეღვინეებს დაახლოებით ერთი მილიონი დოლარის მოცულობის ზარალი მიაყენეს.
© ღვინის კლუბი/Weekend
ბეჭდვა
თქვენი კომენტარი