– როდის გადაწყვიტეთ მარნის დაარსება და რა იყო ამის მიზეზი?
– ღვინოს ოჯახში ყოველ წელს ვწურავდით. 2017 წელს გადავწყვიტეთ აგვეშენებინა მარანი და ღვინო მამა-პაპურად ქვევრში ჩაგვეწურა. ჩვენი მიზანი და სურვილი იყო გაგვეცოცხლებინა ძველი ტრადიციები.
– ვაზის რომელი ჯიშები გაქვთ გაშენებული და კიდევ რომელ ჯიშებზე აპირებთ ყურადღების გამახვილებას?
– გვაქვს პატარა ვენახი სოფელ თოხლიაურში, სადაც ახალშენია კახური მწვანის, ასევე იგეგმება გაზაფხულზე ხიხვის და სიმონასეული წითელის გაშენება. ინტერესი გვაქვს გრძელმტევანასა და კახური მცვივანის ჯიშებიც გავაშენოთ.
– რა ღვინოებს აწარმოებთ და რითაა გამორჩეული თქვენი ღვინო?
– ამ ეტაპზე ბოთლებში ჩამოსხმული გვაქვს საფერავი და რქაწითელი, რომლებმაც ქვევრის საერთაშორისო კონკურსზე დაიმსახურეს ბრინჯაოს და ვერცხლის მედლები.
– გაიხსენეთ საქართველოში ღვინის გაყიდვის თქვენი პირველი გამოცდილება, რომელ მაღაზიებთან გქონდათ ურთიერთობა?
– პირველი გამოცდილება გაყიდვებთან დაკავშირებით მივიღეთ ახალი ღვინის ფესტივალზე. "კახის ღვინო" თითქმის ყველა ღონისზიებაზე იღებს მონაწილეობას. ამ ეტაპზე რამდენიმე ღვინის ბარსა და მაღაზიაში გვაქვს შეტანილი ჩვენი ღვინო.
– გადის თუ არა თქვენი ღვინო უცხოეთის ბაზარზე?
– ჯერჯერობით არა, მომავალში იგეგმება.
– რა სახის სირთულეები შეგხვედრიათ თქვენს საქმიანობაში? რა უნდა დაიხვეწოს ყველაზე მეტად ღვინის სფეროში?
– მეტი ლიტერატურა უნდა იყოს მეღვინეობის თემაზე. ასევე ინფორმაციის მოძიების და გაცვლის სქემა, შეხვედრები და ლექციები გამოცდილ მეღვინეებთან.
– თქვენი აზრით, რა არის ყველაზე მნიშვნელოვანი ფაქტორები თანამედროვე ქართული ღვინის კულტურის განვითარებისთვის?
– მევენახეობა-მეღვინეობის კულტურის განვითარება, რომელიც ხარისხზე იქნება ორიენტირებული.
– რას ურჩევდით დამწყებ მევენახე–მეღვინეებს?
– წარმატებები, წარმატებები და კვლავ წარმატებები...
მარნის დასახელება: "კახის ღვინო",
მისამართი: თბილისი, გლდანი, ზ. მაისურაძის ქ. #4ბ.
ტელეფონი: (+995)577208495; 555403106.
ელფოსტა: qvevriwinekm@gmail.com
ვებგვერდი: კახის ღვინო km qvevriwine
ბეჭდვა
თქვენი კომენტარი