წინანდალი, შუმი, 2005
მალხაზ ხარბედია: "მემგონი ეს ნიმუში ზუსტად შეესაბამება იმ მოთხოვნებს, რითაც წინანდლის ტიპის ღვინო განისაზღვრება ხოლმე. საკმაოდ კარგი ნიმუშია, ჰარმონიული".
დათო მაჭავარიანი: "მართალია თავიდან ცოტა სიხალისე აკლდა და სიმწარეც შესამჩნევი იყო ღვინოში, თუმცა მთლიანობაში მომეწონა".
წინანდალი, ქინძმარაულის მარანი, 2005
შალვა ხეცურიანი: "ძალიან კომპლექსური არომატი აქვს, მდიდარი ხილის ტონებით, მსუბუქი მინერალებით. გემოში უფრო ჩაკეტილია. ბოლოში სიმწარეს ტოვებს."
წინანდალი, თბილღვინო, 2005.
ბონდო კალანდაძე: "რაღაც გარეშე სურნელი იგრძნობა. ცოტათი განსხვავდება იმ ღვინოებისგან, რომელიც ტიპიურია მწვანესა და რქაწითლისთვის. იგრძნობა მუხაც."
წინანდალი, "თელიანი ველი", (მუხაში დავარგებული), 2006
დათო მაჭავარიანი: "როგორც ჩანს, თავიდან უფრო არომატული იყო ღვინო და შემდეგ ცოტათი დაიჟანგა. კასრი ან ჩიფსიც ეტყობა. კარგი გემო აქვს, თუმცა სიხალისე აკლისა. მეტნაკლებად ჰარმონიულია".
წინანდალი, GWS, თამადა, 2003
ნუგზარ ქსოვრელი: "წინა სამ ნიმუშში მეტ-ნაკლებად ერთი მიმართულება იყო. აქ უკვე სხვა ტიპის ღვინოა, ეს ფერზეც ჩანს. არომატზე ოდნავ დაჟანგულია, მცირე .ეწ. პეტროლის ტონები აქვს, მუხაც ჩანს, თუმცა არც დამრგვალებული არ არის, სიმჟავე წინა პლანზე გამოდის."
წინანდალი, თელიანი ველი, 2006.
მალხაზ ხარბედია: "აშკარად ჩანს მწვანის ჯიშური ტონები. პირველი ცხვირი ჩემთვის ძალიან ეკზოტიკურიც კი იყო, ციტრუსის სურნელებით. გემოზე მომრგვალებულია, მცირე სიხისტით. ჯერ-ჯერობით გასინჯული ნიმუშებიდან ამ ღვინოს ყველაზე კარგი დაბოლოება აქვს".
