კახეთში დაკრეფილი ფრანგული ჯიშიდან, სოვინიონ ბლანიდან დაყენებული ეს ღვინო ფერზე მომწვანო ჩალისფერია, ჭიქაში სქლად ისხმება, თუმცა აშკარად ეტყობა, რომ ახალგაზრდა ღვინოა. სურნელებში პირველ რიგში თეთრი ქლიავის, ანანასისა და ბოლომდე დაუმწიფებელი ატმის არომატი ჩნდება. ძალზე ხანგრძლივი ფინალით გამოირჩევა, სადაც ციტრუსებია წამყვანი. ღვინო კარგი მისაყოლებელი იქნება ზღვის ნობათთან, მიდიებთან, კრევეტებთან, მოხარშულ თევზთან.
ეს ღვინო ქართული პირის გემოსთვის ნამდვილი აღმოჩენა იქნება. არამხოლოდ იმიტომ, რომ საქმე საერთაშორისო ჯიშთან, სოვინიონ ბლანთან გვაქვს. საქმე ისაა, რომ ეს სოვინიონი არც ბორდოს და ლუარას კლასიკურ სოვინიონებს იმეორებს (და ვერც გაიმეორებს) და არც ავანგარდულ ახალზელანდიურ სოვინიონებს, სადაც ძალზე ხაზგასმული და აგრესიული სურნელებია. ეს ე.წ. კახური სოვინიონი საკმაოდ თვითმყოფადი ღვინოა, ღია ჩალისფერი, სადაც პირველ დასხმისთანავე ბანანის სურნელი ჩნდება. მოგვიანებით ასევე შეამჩნევთ თეთრი ვარდის სურნელსაც. ღვინო გაცილებით უფრო დახვეწილია, ვიდრე თელიანის შარშანწინდელი სოვინიონ ბლანი და ძალზე ხანგრძლივი დაბოლოებით გამოირჩევა.
ბეჭდვა
თქვენი კომენტარი