გიორგი ბარისაშვილი
ახლოვდება რთველი, რასაც საოჯახო მარნებში საღვინე ჭურჭლის რეცხვა-დეზინფექცია უძღვის წინ. სამწუხაროდ უნდა აღინიშნოს, რომ მარნებში ზოგჯერ ჰიგიენის წესები არაა სათანადოდ დაცული, რაც აისაახება კიდეც ღვინის ხარისხზე. უნდა ითქვას, რომ ყოველ ჭურჭელს ჰიგიენის წესების მხრივ თავისებური მიდგომა ესაჭიროება.
ამჯერად გთავაზობთ მინის ბოცების რეცხვის ერთ ძველ და საასარგებლო წესს. ხშირია შემთხვევა, როდესაც მინის ბოცებს შიდა კედლებზე შერჩენილი აქვს: ღვინის ლექი, ღვინის საღებავი ნივთიერებები, ღვინისავე კრისტალები, რაც ღვინის მიკრობიოლოგიურად დამაბინძურებელ წყაროს წარმოადგენს. მინის ბოცები უპირატესად ონკანის წყლით ირეცხება, რომელი პროცესიც რიგ შემთხვევებში არადამაკმაყოფილებელია, რადგან ჭურჭლის შიდა კედლებს წყლის ჭავლი ვერ აცლის შერჩენილ ჭუჭყს. უნდა აღინიშნოს, რომ დაბიძურებული ბოცის შიდა ზედაპირი ისედაც რთული გასარეცხია და ამ პროცესის შემთხვევაში დიდი ყურადღებაა საჭირო. დაბინძურებული ბოცის შიდა კედლების სარეცხად ერთ-ერთი კარგი საშუალებაა წვრილთვალიანი და ამასთან უჟანგავი ლითონის ჯაჭვი, რომლის სიგრძე დაახლოებით მეტრნახევარი ან ორი მეტრია. ჯაჭვს 2 ლიტრ წყალთან ერთად მოათავსებენ გასარეცხ ბოცაში და ბოცის წინ და უკან მოძრაობით ხდება ბოცის კედლებზე შემხმარი ჭუჭყის მოშორება. ამ დროს ჯაჭვი ჭუჭყს ხეხავს, როგორც დაახლოებით ხელის ჯაგრისი და ბოცა სუფთავდება. როდესაც დარწმუნდებით, რომ ბოცა სუფთაა, ის კარგად უნდა გამოირეცხოს და სასურველია კარგად გამოშრეც მზეზე. გამოყენების წინ ბოცას უნდა ეხრჩოლოს ჩასაბოლებელი გოგირდი.
© ღვინის კლუბი/vinoge.com
ბეჭდვა
თქვენი კომენტარი