წელს კახეთში 94 719 ტონა ყურძნის მოსავალს ელოდებიან, აქედან - 65 211 ტონა რქაწითელს, 24 449 ტონა საფერავს და 5 058 ტონა ჰიბრიდულს და სხვა დანარჩენს. ამის შესახებ კახეთის საინფორმაციო ცენტრს რეგიონის გუბერნატორის მოადგილემ პეტრე კიკნაძემ განუცხადა.
სოფლის მეურნეობის მინისტრის ბაკურ კვეზერელის განცხადებით, კახეთში რთველი 24 აგვისტოს დაიწყება. მისი თქმით, კახეთის მასშტაბით, მიმდინარე წელს, ყურძნის მისაღებად 34 პუნქტი იმუშავებს.
„თვენახევრიან რთველზე გადავდივართ, რაც ადრე საოცნებო იყო. წინა წლებში გვქონდა 20 დღიანი რთველი, დიდი რიგები და ეს აისახებოდა ხარისხზეც“, - აღნიშნა კვეზერელმა.
ყურძნის ყველაზე მეტ მოსავალს, 21 000 ტონას, გურჯაანის რაიონში ელოდებიან.
შეგახსენებთ, რომ გასულ წელს, კახეთში ყურძნის მოსავალმა 125 000 ტონას გადააჭარბა. წელს თელავის, გურჯაანის, ყვარლის, ლაგოდეხის და სიღნაღის რაიონებში, ვენახები დაისეტყვა და მოსავლის მნიშვნელოვანი ნაწილი განადგურდა.
ბეჭდვა
თქვენი კომენტარი