უელსელი მევენახე უკეთესი მოსავლის მისაღებად მატყლს იყენებს

უელსელი მევენახის ახალი იდეა შესაძლოა რევოლუციური აღმოჩნდეს ქვეყნის ღვინის ინდუსტრიისთვის.

ჩრდილოეთ უელსში მდებარე ერთ-ერთ ვენახში ვაზის ძირებში ცხვრის მატყლს აფენენ და ამ გზით ებრძვიან მავნე მწერებს, იუწყება BBC. მათი თქმით, ამ მეთოდის წყალობით, მაქსიმალურად შეამცირეს ვაზის მოვლისას ქიმიური საშუალებების გამოყენება და მოსავლის ხარისხიც მნიშვნელოვნად გაუმჯობესდა.

ვაზის ძირებში მატყლის დაფენის მეთოდის შესახებ პირველად ცნობილმა უელსელმა ფერმერმა, გარეტ ვინ ჯონსმა მოუთხრო მაყურებელს, როდესაც ის მევენახეობა Gwinllan Conwy Vineyard-ს ეწვია. მევენეხეობის მფლობელი, კოლინ ბენეტი, ახალი მეთოდის შედეგებს ,,ფენომენალურს“ უწოდებს. მისი თქმით, ცხვრის მატყლი ხელს უწყობს ტენიანობის შენარჩუნებას, ამცირებს ვაზის დაავადებებს, აფრთხობს მავნებლებს, მაგალითად, ლოკოკინებს, ირეკლავს მზის სინათლეს, ყურძენი უკეთესად მწიფდება და, საბოლოო ჯამში, ვენახი უკეთეს მოსავალს იძლევა. ბენეტი იმედოვნებს, რომ ამ მეთოდის წყალობით, მისი ვენახები, რამდენიმე წელიწადში მთლიანად ორგანულ მეურნეობად გადაიქცევა, უელსელ მეცხვარეებს კი შემოსავლის ახალი წყარო გაუჩნდებათ.

© ღვინის კლუბი/vinoge.com