მსოფლიო ღვინის გურუდ აღიარებულ რობერტ პარკერ უმცროსს, რომელიც ღვინის ყველაზე გავლენიან კრიტიკოსად ითვლება, ესპანეთის სამეფოს მაღალი სახელმწიფო ჯილდო - დიდი ჯვრის ორდენი მიენიჭა. რობერტ პარკერმა, ბორდოსა და რონის ველების ღვინოების უბადლო სპეციალისტმა, დიდი შრომა გასწია ესპანური ღვინოების საერთაშორისო აღიარების მოსაპოვებლადაც. 1947 წელს დაბადებულმა ღვინის ექსპერტმა და კრიტიკოსმა სახელი ღვინის ჟურნალ The Wine Advocate - ში მოღვაწეობით გაითქვა. გარდა სტატიებისა, ის მკითხველს სხვადასხვა ღვინის დეგუსტაციის დეტალებსა და შენიშვნებს აცნობდა, რასაც თან ურთავდა 100 ბალიანი შკალით აღნიშნულ რეიტინგებს. რობერტ პარკერი იყო ერთ-ერთი პირველი იმ საერთაშორისო ექსპერტთაგან, რომელმაც ყურადღება გაამახვილა ისეთ ესპანურ ღვინოებზე, როგორიცაა: Pesquera, Vega Sicilia, Pingus, L’Ermita, Vina El Pison, Clos Martinet და ისინი მსოფლიოს საუკეთესო ღვინოებს შორის დაასახელა. თავის პროგნოზებში რობერტ პარკერი ყოველთვის ხაზგასმით აღნიშნავდა ესპანური ღვინოების ღირსებებს და მათ მსოფლიო აღიარებას უწინასწარმეტყველებდა. მართლაც, ბოლო ხუთი წლის განმავლობაში ჟურნალ The Robert Parker’s Wine Advocate - ის მიერ ესპანურ ღვინოებს რვაჯერ მიენიჭა უმაღლესი, 100 ქულიანი შეფასება. შედარებისთვის – იმავე პერიოდში ასეთი მაღალი შეფასება იტალიურმა ღვინოებმა მხოლოდ სამჯერ დაიმსახურა.
© ღვინის კლუბი/“Weekend“
ბეჭდვა
თქვენი კომენტარი