29 ივნისს ესპანეთის ქალაქ რიოხაში ტრადიციული დღესასწაული - ღვინის ბრძოლა გაიმართება, რომლის მონაწილეებიც ერთმანეთს ღვინით წუწავენ. დღის ბოლოს ტანსაცმელი ყველას მეწამულისფრად აქვს შეღებილი, ჰაერში კი ღვინის საოცარი სურნელი ტრიალებს. ამ სახალისო ბრძოლაში მონაწილეობას იღებენ როგორც ადგილობრივები, ისე საგანგებოდ ამ დღისათვის ჩამოსული ტურისტები. ისინი იარაღად იყენებენ ღვინით სავსე წყლის პისტოლეტებს, პლასტმასის ბოთლებს, კასრებსა და ვედროებს. ცხადია, მონაწილეები სასმელს მხოლოდ ერთმანეთს არ ასხამენ - დიდი სიამოვნებით ისხამენ პირშიც. მთვრალი მონაწილეების წყალობით კი ბრძოლა განსაკუთრებით დაუნდობელი ხდება.
ტრადიციის მიხედვით დღესასწაული რისკოს-დე-ბილიბიოს მთაზე ტარდება, სადაც საუკუნეების წინათ პილიგრიმები დადიოდნენ. ღვინით გაწუწვაც სწორედ მომლოცველთა მოგონილია - პეტრე-პავლობის დღესასწაულს ისინი ასე აღნიშნავდნენ ხოლმე.
ღვინის ბრძოლის მონაწილეებისთვის რამდენიმე წესი არსებობს: უნდა ჩაიცვათ ღია ფერის და იაფფასიანი სამოსი, რომლის გადაგდებაც არ დაგენანებათ; ყელზე უნდა შეიბათ წითელი ყელსახვევი, რაც დღესასწაულის სიმბოლოდ არის ქცეული; არ უნდა გამოიყენოთ მინის ჭურჭელი, რომ საკუთარ თავს ან ზეიმის რომელიმე მონაწილეს საფრთხე არ შეუქმნათ.
© ღვინის კლუბი /Weekend
ბეჭდვა
თქვენი კომენტარი