14-20 სექტემბერს საქართველოში WorldSkills Georgia-სა და გერმანიის საერთაშორისო თანამშრომლობის საზოგადოების (GIZ) მხარდაჭერით პროფესიული განათლების კვირეული გაიმართა, რომლის დასკვნითი ღონისძიება დღეს, მოსწავლე ახალგაზრდობის ეროვნულ სასახლეში ჩატარდა.
ღონისძიებას ესწრებოდნენ საქართველოს განათლებისა და მეცნიერების მინისტრი, თამარ სანიკიძე, განათლების ხარისხის განვითარების ეროვნული ცენტრის, Worldskills Georgia-ს, გერმანიის საერთაშორისო თანამშრომლობის საზოგადოებისა (GIZ) და პროფესიული საგანმანათლებლო დაწესებულებების წარმომადგენლები. როგორც მინისტრმა სანიკიძემ განაცხადა, პროფესიული და სახელობო განათლება სახელმწიფოს საგანმანათლებლო პოლიტიკის ერთ-ერთი პრიორიტეტია.
ღონისძიების დამსწრეებს წარედგინათ GIZ სამხრეთ კავკასიაში კერძო სექტორის განვითარების ხელშეწყობის პროგრამის ფარგლებში მომზადებული პუბლიკაცია - „ხელოსნობა და სამეწარმეო უნარები საქართველოში“ (წიგნი მოამზადეს მაია ნინიძემ და ქეთო ნინიძემ ირაკლი შურღულაიასთან თანამშრომლობით). წიგნის ერთ-ერთი ნაკვეთი ეთმობა საქართველოში მევენახეობა-მეღვინეობის ისტორიასა და სამეწარმეო კულტურას.
ბოლო დროს განსაკუთრებით მწვავედ გამოიკვეთა საქართველოში მევენახეობისა და მეღვინეობის სფეროში უწყვეტი განათლებისა და სამეწარმეო უნარების განვითარების (lifelong learning, professional development) აუცილებლობა.
დღესდღეობით ძალიან მცირეა იმ საგანმანათლებლო დაწესებულებების რიცხვი, რომლებიც დაინტერესებულ ადამიანებს მევენახეობისა და მეღვინეობის დარგში სამეწარმეო უნარების განვითარებისა და სახელობო განათლების სასწავლო პროგრამებს სთავაზობს. ამ ფონზე, უფრო და უფრო იზრდება მოთხოვნა მსგავსი საგანმანათლებლო კურსების მიმართ.
© საქართველოს ღვინის კლუბი, ღვინის საინფორმაციო ცენტრი
ბეჭდვა
თქვენი კომენტარი