მოლდოვაში კარგ მოსავალს ელიან

მოლდოველი მევენახეები წელს მილიონნახევარ ტონაზე მეტ მოსავალს ელიან, რაც  გასული წლის მაჩვენებელზე 15%-ით მეტია. ყურძნის დაახლოებით 90% მთლიანად ღვინის დაყენებას მოხმარდება. ღვინის ქარხნები გლეხებისგან კილოგრამ ყურძენს 26-35 ცენტად ყიდულობენ, თუმცა ფასები შეიძლება კიდევ შეიცვალოს. აღსანიშნავია, რომ მოლდოვური ღვინის წარმოება ბოლო დროს აღმავლობის გზაზეა – ამას მოწმობს თუნდაც ისეთ დიდ ბაზარზე გასვლა, როგორიცაა ჩინეთი. მაგალითისთვის, ჯერ კიდევ 2010 წელს მოლდოვამ ჩინეთისთვის ღვინის მიწოდება შვიდჯერ გაზარდა. გასულ წელს მოლდოვამ ჩინეთში 2,2 მილიონი დოლარის ღვინო გაყიდა, წელიწადნახევრის განმავლობაში კი ვაჭრობის საერთო ბრუნვამ დაახლოებით 50 მილიონი დოლარი შეადგინა. წელს ექსპორტის მოცულობა კიდევ გაიზრდება და, შესაბამისად, მოლდოველ მეღვინეთა შემოსავალიც მოიმატებს.

© ღვინის კლუბი/Weekend