კახეთი რთველის მოლოდინში

რადიო "ჰერეთის" ინფორმაციით, დღესვე მინისტრი რამდენიმე გლეხს იმ ვაუჩერებს წარუდგენს, რომლითაც სუბსიდიის სახით მევენახეებს მთავრობა მოყვანილ მოსავალზე დამატებით თანხას გადაუხდის. კახეთის გუბერნატორი გიორგი ღვინიაშვილი აცხადებს, რომ კახეთში წლევანდელ რთველზე ყურძენს მინიმუმ 10 ქარხანა ჩაიბარებს.

 

მისი თქმით, 10-ვე ქარხანა მუშა პროცესშია და სავარაუდოდ, 2500 ტონამდე ყურძენს ჩაიბარებს. ,,დღეს პირველი პარტია ყურძნის ჩაბარება წნორის ქარხანაში დაიწყო, რადგანაც მოსავლის ნაწილი ადრე შემოდის. გლეხები ინფორმირებულები არიან, თუმცა ჩვენ ყოველდღიურ  მონიტორინგს გავუწევთ  ყველა მოქმედ ქარხანას და მოსავალი ჩაუბარებელი არ დარჩება’’,- აცხადებს ღვინიაშვილი.

 

სოფლის მეურნეობის სამინისტროში კი ამბობენ, რომ კახეთში 100–მდე ღვინის ქარხანა ფუნქციონირებს და ჩაუბარებელი ყურძენი არ დარჩება.

 

ოფიციალური ინფორმაციით, კახეთში რთველის ჩატარებისთვის 24 მილიონი ლარია გამოყოფილი.

 

რთველი კახეთში 5 სექტემბერს გაიხსნება. წელს რეგიონში 160 ათას ტონა ყურძნის მოსავალს ელოდებიან.