ჩინელი კალათბურთელი იაო მინი, რომელიც ამჟამად NBA-ს ჩემპიონატის ყველაზე მაღალი მოთამაშეა, კარიერის დასასრულს მეღვინეობით დაინტერესდა და საკუთარი ღვინის ბრენდის გამოშვებას აპირებს, რომელსაც Yao Family Wines ერქმევა. ღვინის დაყენებას სპორტსმენი ჩინეთში გეგმავს, თუმცა საჭირო ნედლეულის მიღებას კალიფორნიაში, ნაპას ველზე გაშენებულ ვენახებში მოწეული ყურძნისგან აპირებს. წარმოების პროცესის კონტროლი მინმა მეღვინე ტომ ჰინდის ანდო, რომელსაც სხვადასხვა ღვინის კომპანიაში მუშაობის დიდი გამოცდილება აქვს. რამდენიმე დღის წინ იაო მინმა საკუთარი წარმოების პირველი ღვინო - Cabernet Sauvignon 2009 წარადგინა პეკინში, გუანჩჟოუსა და მშობლიურ ქალაქ შანხაიში. აღნიშნული ღვინის საცალო ფასი 289 დოლარია და სულ 1,2 ათასი ბოთლია ჩამოსხმული. მომავალ, 2012 წელს ბაზარზე უკვე გამოვა ღვინო Family Reserve Cabernet Sauvignon, რომელიც ამერიკის შეერთებულ შტატებში გაიყიდება. ვარაუდობენ, რომ Cabernet Sauvignon 2009-ს კალათბურთელი ორგანიზაცია Special Olympics-ის მიერ მოწყობილ საქველმოქმედო აუქციონზე გამოიტანს გასაყიდად, თანხას კი ამავე ორგანიზაციის ფონდში ჩარიცხავს. Special Olympics– საერთაშორისო ორგანიზაციაა, რომელიც გონებრივი განვითარების პრობლემების მქონე პირთათვის ატარებს ოლიმპიადას, ჩინელი სპორტსმენი კი ამ ორგანიზაციის მსოფლიო ელჩია.
© ღვინის კლუბი/Weekend
ბეჭდვა
თქვენი კომენტარი