წლევანდელი ამინდები დიდ ბრიტანეთში, ისევე, როგორც ევროპაში, სიურპრიზებით იყო აღსავსე. მაისის სიცხეებსა და ყურძნის ნაადრევ ყვავილობას წვიმიანი ივნისი მოჰყვა, რამაც ბრიტანელ მეღვინეთა იმედები წლევანდელი მოსავლის თაობაზე ლამის დაასამარა. ღრუბლიანმა ივლისმა პესიმისტური განწყობა კიდევ უფრო გაამძაფრა, თუმცა შუა ზაფხულიდან დამდგარმა ცხელმა ამინდებმა სიტუაცია გამოასწორა. აგვისტოს უჩვეულოდ თბილი და მზიანი სექტემბერი მოჰყვა და ზოგან რთველი ჩვეულებრივზე მთელი სამი კვირით ადრეც კი დაიწყო. მაგალითად, გასულ წელს კენტის საგრაფოში მდებარე მამულ Hush Heath-ში რთველი 21 ოქტომბრამდე გაგრძელდა, წელს კი სექტემბრის დასასრულს უკვე დამთავრებული იყო. წლევანდელი მოსავალი, საერთო ჯამში, შესანიშნავი ხარისხისაა. ყურძენი ბოლომდე, კარგად დამწიფდა და აშკარაა, რომ არანაირი შაპტალიზაცია არ დაჭირდება. თუმცა წლევანდელი მოსავალი, 2009-2010 წლებთან შედარებით, ორჯერ ნაკლებია. მოსავლით უკმაყოფილონი დარჩნენ ცქრიალა ღვინის მწარმოებლები - პოლიფენოლებისა და არომატული ნივთიერებების შემცველობის მაღალი მაჩვენებლის მიუხედავად, ყურძენს საკმაო მჟავიანობა არ გააჩნია.
© ღვინის კლუბი/Weekend
ბეჭდვა
თქვენი კომენტარი