გამოფენა - „ეტიკეტის ხელოვნება“

2016 წლის 18 დეკემბერს, 18:00 საათზე, საქართველოს ეროვნული მუზეუმის სიმონ ჯანაშიას სახელობის საქართველოს მუზეუმში დავით სარაჯიშვილისადმი მიძღვნილი გამოფენა გაიმართება. „ეტიკეტის ხელოვნება“, ასე ქვია ექსპოზიციას, რომელზეც XIX საუკუნის დასასრულისა და XX–ის დასაწყისის ქართული ღვინის 200-მდე ეტიკეტი იქნება წარმოდგენილი.

ამ პერიოდში ქართული ღვინის წარმატებას ხარისხთან ერთად მისი დიზაინიც განაპირობებდა. საინტერესოა, რომ იმ დროისთვის საქართველოში უკვე მაღალპოლიგრაფიული შესრულების ეტიკეტებს ბეჭდავდნენ (კონსტანტინე მესხიშვილის, ექვთიმე ხელაძის, არსენ კალანდაძის სტამბებში), თუმცა ხშირი იყო ლოძის, ვარშავის, ბაქოს, ვილნიუსისა და სხვა ქალაქების სტამბებში დაბეჭდილი ღვინის ეტიკეტებიც.

გამოფენაზე საქართველოს ეროვნული მუზეუმიდან წარმოდგენილი იქნება ქართული ღვინის ეტიკეტების კოლექცია, ყიფიანების ღვინის გრან პრი და დიპლომი, ეტიკეტები კერძო კოლექციებიდან. ასევე, ადრეული კონიაკის ეტიკეტების ნიმუშები დავით სარაჯიშვილის კოლექციიდან. პროექტი ხორციელდება ღვინის ეროვნული სააგენტოს პატრონაჟით. პროექტის ორგანიზატორია საერთაშორისო კინოფესტივალი ,,კინოვინო’’. გამოფენა „ეტიკეტის ხელოვნება“ 2017 წლის 8 იანვრამდე გაგრძელდება. გამოფენის კურატორი ნინო კაჭარავაა, დიზაინერი – მანანა არაბული. გამოფენის კონსულტანტები:  ბონდო კალანდაძე, გიორგი სარაჯიშვილი.

© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი