გაიმარჯვა ბუნებრივმა საცობმა

როცა ღვინის შეფუთვაზე მიდგება საქმე, ამერიკელები ნატურალური მასალის საცობებს ამჯობინებენ. მათი აზრით, ასეთი შეფუთვა გაცილებით ხარისხიანია, ვიდრე მისი ალტერნატიული საშუალებები - მეტალის ხუფები და სინთეტური საცობები. ამის დასტურია კომპანია Tragon-ის ახალი გამოკვლევა, რომლის მიხედვითაც გამოკითხულ რესპოდენტთა 94% თვლის, რომ თანაბარ პირობებში ისინი კორპის საცობიანი ბოთლის ღვინის შეძენას ამჯობინებენ. გამოკითხულთა თითქმის იგივე რაოდენობა, 93% მიიჩნევს, რომ ნატურალური საცობები ალტერნატიულისაგან უკეთესი ან ძალიან მაღალი ხარისხით გამოირჩევა. “გასაოცარია ეს შედეგები, რადგან ჩვენ იშვიათად ვაწყდებით მომხმარებელთა ასეთი უმრავლესობის ერთსულოვნებას. ჩვეულებრივ, 70% ითვლება ხმათა უმრავლესობად, მაგრამ 94% - ეს გაუგონარი მაჩვენებელია” – აღნიშნა კომპანია Tragon-ის ვიცე-პრეზიდენტმა, რებეკა ბლაიბაუმმა. აქვე უნდა ითქვას, რომ გამოკითხულთა მხოლოდ 45% დაფიქრდებოდა ხრახნიანი თავსახურის მქონე ბოთლის ღვინის შეძენაზე, 72% სინთეტური შეფუთვის წინააღმდეგი არ არის. მომხმარებელთა 90% ამჯობინებს, წვეულებებსა და სხვა ღონისძიებებზე საჩუქრად ღვინო საცობიანი ბოთლით შეიძინოს. 60%-ის აზრით, სასაჩუქრე ბოთლებისათვის მისაღები არ არის სინთეტური საცობები, გამოკითხულთა 78% კი ასეთი შემთხვევისათვის შეუფერებლად მიიჩნევს ხრახნიან თავსახურებს.

© ღვინის კლუბი/Weekend