გამოქვეყნებულია: 19 ივლისი, 2010 - 13:57
2015 წლისთვის საფრანგეთმა, შესაძლოა, დაკარგოს მსოფლიოში ღვინის უპირველესი მწარმოებლის ტიტული, მისი ადგილი კი ესპანეთმა დაიკავოს - ასეთ პროგნოზს აკეთებენ საფრანგეთის დამოუკიდებელი მეღვინეები. კვლევითი ცენტრის (Credoc) მონაცემებით, 2015 წლისთვის ფრანგული ღვინის წლიური წარმოება 43,9 მილიონ ჰექტოლიტრამდე შემცირდება - შედარებისთვის, 200-2004 წლებში ეს მაჩვენებელი 52,8 მილიონ ჰექტოლიტრს შეადგენდა.
ფრანგული ღვინის მოხმარებამ ქვეყნის შიდა ბაზარზეც იკლო, ეს განსაკუთრებით თვალშისაცემია წითელი ღვინის შემთხვევაში. მისი მოხმარება, საერთო ჯამში, ბოლო ხუთი წლის განმავლობაში 2,6%-ით დაეცა და სავარაუდოდ, ყოველწლიურად 1,1%-ით განაგრძობს ვარდნას. ამის მიზეზად ფრანგების მიერ საკუთარ ჯანმრთელობაზე ზრუნვა სახელდება - ისინი სადილობისას ღვინოს ახლა უფრო ხშირად უალკოჰოლო სასმელებს ამჯობინებენ.
რაც შეეხება ექსპორტს - საფრანგეთი აქაც ნელ-ნელა თმობს პოზიციებს და დასავლეთ ევროპის, ამერიკის, დიდი ბრიტანეთის, ჩინეთისა თუ იაპონიის ბაზრის წილებს ე.წ. ახალი სამყაროს წამომადგენელ კონკურენტებთან იყოფს.
საფრანგეთის დამოუკიდებელი მეღვინეები, რომლებიც ფრანგული ღვინის თითქმის ნახევარს აწარმოებენ, შეაშფოთა ამგვარმა არასახარბიელო პროგნოზმა. ისინი მზად არიან, ყველა ღონე იხმარონ ღვინის ბაზარზე არსებული სიტუაციის გამოსასწორებლად და მოსალოდნელი უარყოფითი შედეგების თავიდან ასაცილებლად.
© ღვინის კლუბი/“Weekend“
თემა:
ბეჭდვა
თქვენი კომენტარი