ბრაზილია და ალკოჰოლიზმი

ჯანდაცვის მსოფლიო ორგანიზაციის მიერ გამოქვეყნებულმა დოკუმენტმა ბრაზილიაში ალკოჰოლის მოხმარების შესახებ აჩვენა, რომ ამ სფეროში  ქვეყანა თითქმის 50%-ით აჭარბებს მსოფლიოს საშუალო მაჩვენებელს. კერძოდ, გამოკვლევის შედეგად დადგინდა, რომ ბრაზილიელები წლის განმავლობაში საშუალოდ 24,4 ლიტრ ალკოჰოლს (მათ შორის ქალები – 10 ლ.) სვამენ მაშინ, როდესაც მსოფლიოს მასშტაბით ეს მაჩვენებელი საშუალოდ 6,1 ლიტრს შეადგენს. ქვეყანაში ალკოჰოლის მიზეზით სიკვდილიანობის ინდექსიც საკმაოდ მაღალია – 7,2%, ამ მხრივ კონტინენტის მონაცემებს ორჯერ აჭარბებს და  აბსოლუტური ლიდერია. ბრაზილიელთა 30% აღიარებს, რომ ხშირად სვამს და კვირაში საშუალოდ ერთხელ მაინც თვრება. შედარებისთვის, ეს მაჩვენებელი  რუსეთში 21%, ამერიკის შეერთებულ შტატებში 13% და იტალიაში 12% აღწევს. ჯანდაცვის მსოფლიო ორგანიზაციის კვლევების მიხედვით, ბოლო ხუთი წლის განმავლობაში ალკოჰოლით გამოწვეული ლეტალური შედეგები უფრო მეტია, ვიდრე მიწისძვრებით, გლობალური ეპიდემიებით, შიდსით, ტუბერკულოზით, ძალადობითა და ომით გამოწვეული სიკვდილიანობის მაჩვენებელი. პლანეტის მოსახლეობის სიკვდილიანობის მაჩვენებლის 4% სწორედ ალკოჰოლს უკავშირდება. საერთო ჯამში, ეს წელიწადში 2,5 მილიონი ადამიანია.

© ღვინის კლუბი/Weekend