რთველი 2015 ყველაზე აქტიურ ფაზაში შევიდა. დღითიდღე იზრდება ყურძნის დღიური გადამუშავების მაჩვენებელი, რომელმაც 23 სექტემბერს 6 722 ტ. შეადგინა, ხოლო 24 სექტემბერს - 7 100 ტ.
8 000-მდე მევენახემ ღვინის სახელმწიფო და კერძო საწარმოებს ყურძნის ნედლეული უკვე მიჰყიდა. კახეთში, ამ ეტაპზე, ყურძნის რეალიზაციის შედეგად მიღებულმა შემოსავალმა 35 მლნ ლარს მიაღწია.
25 სექტემბრის დღის 12:00 საათის მონაცემებით, ღვინის კომპანიების მხრიდან გადამუშავებულია სულ 57 040 ტ. ყურძენი, რომელთაგან 23 902 ტ. რქაწითელია, 24 851 ტ. საფერავი, ხოლო კახური მწვანე - 1 616 ტ.
ეს მონაცემები ბოლო ორი წლის სტატისტიკისგან იმით განსხვავდება, რომ ამ დრომდე საფერავზე უფრო მაღალი მოთხოვნა იკვეთება, ვიდრე - რქაწითელზე. გასულ წელს რქაწითელის გადამუშავების მაჩვენებელი, თითქმის, ორჯერ აღემატებოდა საფერავისას, ხოლო 2013 წლისა - დაახლოებით, სამჯერ.
ეს, შესაძლოა, იმ ტენდენციითაც აიხსნას, რომ ალექსანდროულსა და მუჯურეთულზე გასულ წელს უპრეცედენტოდ მაღალი ფასების გამო აღნიშნული ჯიშის ყურძენზე წელს მოთხოვნა, შედარებით შემცირდეს და წითელი ნახევრად ტკბილი ხვანჭკარა, ამავე ტიპის ქინძმარაულმა ჩაანაცვლოს. ამას ღვინის საინფორმაციო ცენტრთან საუბარში სხვადასხვა კომპანიები, ჯერ კიდევ, ივნისში პროგნოზირებდნენ.
ღვინის ეროვნული სააგენტოს მონაცემებით, ყურძნის გადამუშავების პროცესში ჩართულია ღვინის 62 კომპანია, რომელთა შორისაა თბილღვინო, კახური ტრადიციული მეღვინეობა, შუხმან ვაინს ჯორჯია, კორპორაცია ქინძმარაული, თელავის ღვინის მარანი, GWS, დუგლაძეების ღვინის კომპანია, თელიანი ველი, კოტეხის ღვინის მარანი და სხვ. რომელთაგან ნაწილი მხოლოდ საკუთარ ვენახში მოწეულ ყურძენს გადაამუშავებს, ნაწილი - ნედლეულს ადგილობრივი მევენახეებისგან შეისყიდის.
ამის პარალელურად, სახელმწიფო განაგრძობს მევენახეებისგან ყურძნის შეუზღუდავ შესყიდვას, მის მიერ ნედლეულის გადასამუშავებლად საგანგებოდ დაქირავებულ 17 კერძო საწარმოში.
ამ დროისთვის ყველაზე დიდი რაოდენობით ყურძნის გადამუშავება, სწორედ, გურჯაანის მუნიციპალიტეტში აღინიშნება, ყველაზე მცირე მოცულობით კი, ჯერჯერობით, საგარეჯოში.
გთავაზობთ ყურძნის გადამუშავების აქტუალურ მონაცემებს მუნიციპალიტეტების მიხედვით:
გურჯაანი - 19 680 ტ.
ყვარელი - 11 229 ტ.
თელავი - 10 563 ტ.
სიღნაღი - 6492 ტ.
ლაგოდეხი - 4 624 ტ.
დედოფლისწყარო - 1842 ტ.
ახმეტა - 1318 ტ.
საგარეჯო - 1260 ტ.
მევენახეების საპროტესტო აქციები შეწყდა. ჩვენს ხელთ არსებული ინფორმაციით, ამ დროისათვის საწარმოებთან რიგები დგას, რადგან მიმდინარე კვირა განსაკუთრებით დატვირთულია ყურძნის მიღება-გადამუშავების თვალსაზრისით.
© საქართველოს ღვინის კლუბი, ღვინის საინფორმაციო ცენტრი.
ბეჭდვა
თქვენი კომენტარი