ეკვადორელმა მეცნიერებმა მსოფლიოში უძველეს ალკოჰოლურ საფუვრებს მიაკვლიეს, რომელთა ასაკიც 1 300 წელს აჭარბებს. როგორც ამბობენ, ეს მიკროორგანიზმები მეცნიერებისთვის უცნობ სრულიად ახალ სახეობებს წარმოადგენს. უნიკალური აღმოჩენა ეკუთვნის ეკვადორის კათოლიკური უნივერსიტეტის სწავლულს, ბიოლოგ ჯავიერ კალვაჯარ ბარიგას, რომელმაც უძველეს ფერმენტები 30 წლის წინ ნაპოვნ ალკოჰოლური სასმლის დასაყენებელ თიხის ჭურჭელში აღმოაჩინა. მეცნიერების ვარაუდით, ამ ჭურჭელს ჩვენი წელთაღრიცხვის 200-დან 800 წლამდე ინდიელთა ის ტომები იყენებდნენ, რომლებიც თანამედროვე ეკვადორის ტერიტორიაზე ცხოვრობდნენ. ალკოჰოლური სასმელი სიმინდისგან მზადდებოდა და “ჩიჩა” ეწოდებოდა. დოქტორმა ბარიგამ უძველესი საფუვრები თავის ლაბორატორიაში აღადგინა. მეცნიერის განცხადებით, მან რამდენიმე სახის საფუვრის გამოყოფა შეძლო, მაგრამ საინტერესო ისაა, რომ თანამედროვე ღვინის წარმოებაში არცერთი მათგანი აღარ მონაწილეობს. თიხის ჭურჭელი, რომელშიც ეს მიკროორგანიზმები აღმოჩნდა, მშენებლებმა 1980 წელს, ეკვადორის დედაქალაქ კიტოში შენობის საძირკვლის გათხრისას აღმოაჩინეს. შემთხვევის ადგილზე მისულმა არქეოლოგებმა კი 10 სამარხი იპოვნეს, სადაც ცხედრებს საკვები და ღვინოც ჰქონდათ ჩატანებული - ძველ ინდიელთა რწმენით, მიცვალებულებს ჭამა-სმა იმქვეყნიურ სამყაროშიც სჭირდებოდათ.
© ღვინის კლუბი/Weekend
ბეჭდვა
თქვენი კომენტარი