ღვინო - ახლობლების რჩევით?

ავსტრალიელმა მარკეტოლოგებმა დაასკვნეს, რომ ღვინის მოყვარულები ამ შესანიშნავი სასმლის არჩევისას ყველაზე მეტად ოჯახის წევრებისა და მეგობრების რჩევას ითვალისწინებენ და არა სპეციალისტების. 

მარკეტინგული კომპანია Nielsen-ის კომერციული კვლევისა და მომხმარებელთა ქცევის შემსწავლელი განყოფილების ხელმძღვანელმა მაიკლ უოლტონმა განაცხადა, რომ ღვინის მოყვარულთა 84% ჯერ კიდევ ახლობლებისა და მეგობრების რჩევით ყიდულობს სასმელს. თუმცაღა, სიტუაცია ნელ-ნელა იცვლება და მომხმარებლები უფრო მეტად ენდობიან ალკოჰოლური სასმელების მწარმოებელი კომპანიების საიტებზე განთავსებულ რეკომენდაციებს. Nielsen-ის გამოკვლევამ აჩვენა, რომ ღვინის მოყვარულთა 69% ენდობა ოფიციალურ რეკომენდაციებს, დაახლოებით 68%-სათვის კი მეტად მნიშვნელოვანია სხვა მომხმარებელთა გამოხმაურებები, რომლებიც კომპანიების საიტებზე გვხვდება. 

ბატონი უოლტონი ალკოჰოლური სასმელების მწარმოებელ კომპანიებს მოუწოდებს, რომ მომხმარებელთა ნდობა უკეთ გამოიყენონ და მოგება გაზარდონ: ვებგვერდებზე განთავსებულ რეკომენდაციებს ხომ, უპირველეს ყოვლისა, სწორედ ელიტური, ძვირფასი სასმლის მოყვარულები ითვალისწინებენ. 

Nielsen-ის მონაცემებით, მწარმოებლისადმი მომხმარებელთა ნდობის მაჩვენებელმა 2013 წლის ივნისში ინდონეზიაში 124% შეადგინა, ჩინეთში – 110%, ავსტრალიაში – 98%, ხოლო აშშ – 96%.