გამოქვეყნებულია: 6 ნოემბერი, 2009 - 01:21
„ღვინის კლუბის“ ინიციატივით, „კავკასიურ სახლსა“ და „ღვინის სამყაროში“ დაიწყო ლექცია–სემინარების ციკლი, რომლის მიზანია: ღვინისა და გემოვნების კულტურის ამაღლება, მაღალი ხარისხის ღვინის პროპაგანდა და საზოგადოების ინფორმირება როგორც სიახლეების, ისე მეღვინეობასა თუ მევენახეობაში არსებული პრობლემების შესახებ.
ორ კვირაში ერთხელ ლექციებს წაიკითხავენ მეღვინეობა–მევენახეობის სპეციალისტები, ეთნოგრაფები, კულტუროლოგები და სხვა პროფესიის ადამიანები, რომლებსაც შეუძლიათ, თავიანთი წვლილი შეიტანონ კლუბის მიზნების განხორციელებაში.
27 ოქტომბერს, მაღაზია–სალონ „ღვინის სამყაროში“ (რ. ლაღიძის ქ. 2, "ოპერასთან") პირველი ლექცია - „ღვინის დაგემოვნების შესავალი“ წაიკითხა ცნობილმა ენოლოგმა, კორპორაცია „ქინძმარაულის“ გენერალურმა დირექტორმა, ავსტრიის სადეგუსტაციო კომისიის წევრმა, ნუგზარ ქსოვრელმა. მისი ლექცია ეხებოდა როგორც ღვინის დაგემოვნების პროფესიულ საიდუმლოებებს, ისე მეღვინეობისათვის დამახასიათებელ პრობლემებს, რაც გამოწვეულია ვაზისა და ღვინის სხვადასხვა დაავადებით. ლექცია–სემინარის სრული ვიდეოჩანაწერი გამოქვეყნდება ბლოგზე www.vinoge.com.
ნუგზარ ქსოვრელთან ერთად „ღვინის კლუბის“ წევრებმა დააგემოვნეს ექვსი სახეობის ქართული ღვინო:
1) წინანდალი 2007– კორპორაცია ქინძმარაული, ღვინის ქ–ნა „ვაზის ცრემლები“;
2) კახური 2007– "ენისელის ღვინოები";
3) თავკვერი 2005 – „ოკამი“;
4) ყვარელი 2004 – „კონჭო და კომპანია“;
5) მერლო – "ბესინი";
6) ქინძმარაული 2007 – ღვინის ქ–ნა „ვაზის ცრემლები“;
4) ყვარელი 2004 – „კონჭო და კომპანია“;
5) მერლო – "ბესინი";
6) ქინძმარაული 2007 – ღვინის ქ–ნა „ვაზის ცრემლები“;
ჩამოთვლილი ღვინოებიდან ყველაზე საინტერესო ღვინოდ ერთხმად დასახელდა „ყვარელი 2004“ – „კონჭო და კომპანია“, რომელიც გამოირჩეოდა სიძველის სასიამოვნო ტონებით, ტყის კენკრის არომატით და ამავე დროს, შემდგომი დაძველების პოტენციალით.
„ღვინის კლუბის“ მომდევნო ლექცია–სემინარი, რომელიც სამშაბათს 10 ნოემბერს 18:00 საათზე „კავკასიურ სახლში“ ჩატარდება, ბევრს დააინტერესებს. ამჯერად, “ვაზისა და ხეხილის სარგავი მასალის წარმოების ეროვნული ცენტრის” ხელმძღვანელი, სოფლის მეურნეობის მეცნიერებათა დოქტორი, ლევან უჯმაჯურიძე ისაუბრებს თემაზე – „იშვიათი ქართული ვაზის ჯიშები და ჯანსაღი სარგავი მასალის წარმოება“. იშვიათი ჯიშების გარდა ლექცია შეეხება სამრეწველო და ინტროდუცირებულ ვაზის ჯიშებსაც, მათ ჯიშურ სიწმინდეს, ხარისხსა და დაავადებებს.
© ღვინის კლუბი/vinoge.com
ბეჭდვა
ლექციაზე დასწრება უფასოა, მაგალითად, შემდეგ ლექციაზე თავისუფლად შეგიძლიად მობრძანდეთ. თუმცა ღვინის დეგუსტაციებზე დასწრება ან იმ სემინარებზე დასწრება, რომლებსაც დეგუსტაციებიც ახლავს თან, ჯერ–ჯერობით შეზღუდულია, მხოლოდ კლუბის წევრები ესწრებიან.
მარტივად. საკმარისია მეილი გამოაგზავნოთ contact@vinoge.com ან kharbedia@yahoo.com ზე. ეს იქნება უკვე თქვენი ოფიციალური განაცხადი. შემდეგ მე გამოგიგზავნით ანკეტას, რომელიც უნდა შეავსოთ და გადმომიგზავნოთ. მომავალ სამშაბათს, კლუბის სხდომაზე შევალ წინადადებით თქვენი გაწევრიანების შესახებ და გახდებით ღვინის კლუბის წევრი.
გაითვალისწინეთ, ღვინის კლუბის ყველა წევრი ყოველთვიურ საწევროს, 10 ლარს ვიხდით.
თავიდან ყველა სემინარს ვიდეოზე ვიღებდით, უბრალოდ ძალიან დიდი ფაილებია და მის ატვირთვას დიდი დრო უნდა. მომავალში ვეცდებით აუდიო ფაილები მაინც გავაკეთოთ. ასე უფრო მოსახერხებელი იქნება.
თქვენი კომენტარი