– როდის გადაწყვიტეთ მარნის დაარსება და რა იყო ამის მიზეზი?
– ღვინის დაყენება ჩვენი ოჯახის ტრადიციული საქმიანობაა, 2015 წლიდან კი პროგრამა „აწარმოე საქართველოში“ მონაწილეობით შევძელით ჩვენი ბრენდი შეგვექმნა და მცირე საოჯახო ბიზნესი დაგვეწყო.
– ვაზის რომელი ჯიშები გაქვთ გაშენებული და კიდევ რომელ ჯიშებზე აპირებთ ყურადღების გამახვილებას?
– გაშენებული გვაქვს იმერული ჯიშები, ცოლიკოური, ციცქა, კრახუნა. საშემოდგომოდ ვგეგმავთ ერთი ძალიან ძველი იმერული ჯიშის დარგვას, ვფიქრობთ მცირედით გავზარდოთ ვენახების რაოდენობა.
– რა ღვინოებს აწარმოებთ და რითაა გამორჩეული თქვენი ღვინო?
– ვაწარმოებთ: ცოლიკოური ქვევრში, ციცქა-ცოლიკოურის და ციცქა-ცოლიკოურ-კრახუნას.
– გაიხსენეთ საქართველოში ღვინის გაყიდვის თქვენი პირველი გამოცდილება, რომელ მაღაზიებთან გქონდათ ურთიერთობა?
– ღვინის ბრენდირებულად გაყიდვა პირველად 2015 წელს დავიწყეთ, მაღაზიები თვითონ დაგვიკავშირდნენ, ეს იყო ღვინის მაღაზია გრიბოედოვზე და ღვინის გალერეა. დღეს უკვე ძალიან გავამრავალფეროვნეთ გაყიდვის არეალი და მათ რიცხვს რესტორნებიც შეემატა.
– გადის თუ არა თქვენი ღვინო უცხოეთის ბაზარზე?
– ჯერ არა.
– რა სახის სირთულეები შეგხვედრიათ თქვენს საქმიანობაში? რა უნდა დაიხვეწოს ყველაზე მეტად ღვინის სფეროში?
– სირთულეები პირველ რიგში ჩვენს ცოდნას უკავშირდება, ბევრი ისეთი საკითხია, რაზეც ვისურვებდით უფრო მეტი ინფორმაცია გვქონოდა. ვცდილობთ ცოდნის ეს ვაკუუმი შევავსოთ. ამასთან ფინანსებთან წვდომის პრობლემაც არსებობს. კომპანიის საკუთარი ფინანსები ხშირად ვერ წვდება ისეთ მნიშვნელოვან საკითხებს სოფლის მეურნეობაში, როგორიცაა ტრაქტორისა თუ მეღვინეობითვის სხვა მნიშვნელოვანი ტექნიკური აღჭურვილობის შეძენა
– თქვენი აზრით, რა არის ყველაზე მნიშვნელოვანი ფაქტორები თანამედროვე ქართული ღვინის კულტურის განვითარებისთვის?
– ვფიქრობ, ბიო წარმოება ქართულ ღვინოს ძალიან გაუმტკიცებს სახელს, გამომდინარე იმ სავაჭრო შესაძლებლობიდან, რაც დღეს ჩვენს ქვეყანას აქვს, ვფიქრობ ბევრი ევროპელი თუ ჩინელი ექსპორტიორი დაინტერესდება ჩვენი პროდუქციით. საინტერესო იქნება, თუ მომავალში იმდენად გაძლიერდება ეს სექტორი, რომ შევძლოთ ძლიერი ღვინის კლასტერის ჩამოყალიბება.
– რას ურჩევდით დამწყებ მევენახე–მეღვინეებს?
– ჩვენი გამოცდილებიდან გამომდინარე, ვურჩევდი მეტი ინფორმაციისა და განათლების მიღებას ამ სფეროში. ასევე ღვინის კლუბის ლექციებზე დასწრებას, სადაც ბევრ გამოცდილ და ღვინის სფეროში განათლებულ ადამიანს შეხვდება.
საკონტაქტო ინფორმაცია:
ბაიას ღვინო
მისამართი: ბაღდათი, სოფელი მეორე ობჩა
ტელეფონი: +995 599682822
ელფოსტა: lana.abuladze@gmail.com
ვებ/ფეისბუკ გვერდი: ბაიას ღვინო /Baia's Wine
© საქართველოს ღვინის კლუბი, ღვინის ეროვნული სააგენტო, ღვინის საინფორმაციო ცენტრი
ბეჭდვა
თქვენი კომენტარი