ფოტოს ავტორი ნანა ჩხიკვაძე
მოამზადა ელენე ცინცაძემ
გუშინ, 9 ოქტომბერს "საქართველოს სომელიეთა ასოციაციამ" 2024 წლის საუკეთესო სომელიე გამოავლინა. გამარჯვებულია საბა ქიტიაშვილი, რომელიც 2020 წლიდან კონკურსის მონაწილეა. მეორე და მესამე ადგილები კი რეზი ცეცხლაძემ და თეონა თოხაძემ გაინაწილეს. საბა ქიტიაშვილის მეღვინეობას Spring Fields 19 ოქტომბერს, ჩვენს ფესტივალზე “მცირე მარნები დიდ ასპარეზზე” შეხვდებით, სადაც საბა თავად გაგაცნობთ მის ღვინოებსა და მარანს.
კონკურსი ჩატარდა ორ ნაწილად, პირველ ნაწილში ინდივიდუალური, ხოლო მეორე ნაწილში კოლექტიური ასპარეზობით მონაწილეებმა თავიანთი ცოდნა წარმოაჩინეს. წლევანდელმა ფინალისტებმა გამოავლინეს უნარები ღვინის დეგუსტაციაში, დეკანტირებაში, წარმატებულად გაართვეს თავი სხვადასხვა დავალებას, მათ შორის მთელი მსოფლიოდან მარნებისა და შატოების გამოცნობას, ეტიკეტებში შეცდომების ძიებას, ღვინისა და კერძის შეხამებას და ა.შ. შედეგები შეაფასა ჟიურიმ, რომელთა წევრებს შორისაც იყო კობა აბრამიშვილი, (საქართველოს საუკეთესო სომელიე 2022), ჯაბა ძიმისტარიშვილი (საქართველოს საუკეთესო სომელიე 2020) სომელიეთა ასოციაციის ხელმძღვანელი შალვა ხეცურიანი, თამაზ თამაზაშვილი - 2018 წლის კონკურსის გამარჯვებული, ღვინის ეროვნული სააგენტოს თავმჯდომარე ლევან მეხუზლა, ასევე გერმანიის, იტალიისა და საფრანგეთის სრულუფლებიანი ელჩები საქართველოში და სხვანი. კონკურსის დასრულებისთანავე საბა ქიტიაშვილს ვესაუბრეთ:
- საბა, გვითხარით, როგორია თქვენი შთაბეჭდილებები კონკურსის დასრულების და გამარჯვების ტიტულის მოპოვების შემდეგ?
- ჩემთვის უფრო სხვა ამბავი იყო. არ ვიცოდით რა იქნებოდა წელს, რადგან შარშანაც ცუდად დავწერე გამოცდები, წელსაც, მეგონა რომ ისეთი არ იყო ჩემი ნაშრომი, როგორიც უნდა ყოფილიყო. ველოდი, რომ მომავალ წელს კიდევ მომიწევდა დაწერა. ცოტა იმაშიც კი მეპარებოდა ეჭვი, ფინალში მოვხვდებოდი თუ არა. ფინალში რომ მოვხდი და ჩემს კონკურენტად დიმა არ იყო, ეს ძალიან გამიკვირდა, მაგრამ სცენაზე უფრო ნაკლები კონკურენცია აღმოჩნდა ჩემთვის, ვიდრე მეგონა.
- როდესაც დანარჩენ ფინალისტებთან ერთად უკვე სცენაზე ახვედით, რამდენად გერთულათ დავალებები?
-- მხოლოდ თავიდან, პირველი ორი წუთის განმავლობაში არის სტრესი, შემდეგ კი პირიქითაა. ეს არის სიამოვნება, რომელსაც სომელიეები ყოველდღიური სერვირების დროს ვიღებთ. სომელიეს არ აქვს მარტივი სამუშაო გარემო, ის ყველაფერი, რაც დავალებად გვქონდა, ჩვენ უკვე გავლილი გვაქვს და ამაში ძალიან რთული და წარმოუდგენელი თითქოს არაფერია, თუმცა დიდი პუბლიკის წინ წარსდგე მაინც სხვანაირი გრძნობაა. ძალიან საინტერესო დავალებები იყო, კონკურსის სირთულე კი, როგორც უკვე გითხარით, ძალიან ნაცნობია ჩვენთვის, სომელიეებისთვის, რომლებიც ყოველდღიურად ამ საქმეს დიდ დროს ვუთმობთ.
-თუ ელოდებოდით გამარჯვებას და რამდენად მნიშვნელოვანია თქვენთვის, თქვენი კარიერისთვის ეს წინსვლა.
- სიმართლე გითხრათ, თავიდან ძალიან ვინერვიულე, თუმცა რამდენიმე დავალების შემდეგ მივხვდი, რომ მოსალოდნელი იყო ჩემი პირველობა. რაც შეეხება ამ ტიტულს, რა თქმა უნდა, ძალიან მიხარია და ძალიან მნიშვნელოვანია ჩემთვის ის, რომ 2024 წლის საქართველოს საუკეთესო სომელიე გავხდი.
კონკურსის შესახებ გერმანიის ელჩი, ერნსტ პეტერ ფიშერიც გვესაუბრა, რომელმაც აღნიშნა, რომ ღონისძიება ძალიან შთამბეჭდავი იყო: “პირველ რიგში, წარმატებას ვუსურვებ ფინალისტებსა და გამარჯვებულს. კონკურსი იყო ძალიან შთამბეჭდავი და საინტერესო. ერთ-ერთმა მონაწილემ მნიშვნელოვანი ფრაზა გააჟღერა და თქვა, რომ ის, რაც გერმანიას, იტალიას, საფრანგეთსა და საქართველოს ერთმანეთთან აკავშირებს - ერთიანობაა და ეს მართლაც ასეა. მგონია, რომ სწორედ ერთიანობით შევძლებთ კიდევ უფრო ახლოს და მჭიდროდ ყოფნას ერთმანეთთან, ვიდრე ახლაა”.
დაჯილდოვების ცერემონიაზე შეხვდებოდით მეღვინეებს, ღვინის იმპორტიორებს, ენთუზიასტებს, ღვინის დიდოსტატებსა და მოყვარულებს. ღონისძიების შესახებ ღვინის მცოდნეს, ღვინის ეროვნული სააგენტოს მარკეტინგის დეპარტემენტის უფროსსა და “სველი ძაღლის” მეღვინე ირაკლი ჩოლობარგიასაც ვესაუბრეთ: “ეს კონკურსი 2016 წლიდან ძალიან მნიშვნელოვანი ღონისძიებაა საქართველოში. სომელიე ერთ-ერთი ყველაზე პოპულარული პროფესია გახდა საქართველოში და ძალიან ბევრი ახალგაზრდაა ჩართული ამ ამბავში. ეს მნიშვნელოვანია, რადგან ამასთანავე “საქართველოს სომელიეთა ასოციაცია” საერთაშორისო ასოციაციის წევრია და იძლევა ძალიან დიდ საშუალებას, საერთაშორისო ასპარეზზე გავიდნენ ჩვენი ქართველო სომელიეები და რაც შეიძლება მეტ ღვინოსა და ღვინის კულტურას გაეცნონ. ეს კი, თავისთავად, გაზრდის მოთხოვნას როგორც ქართულ ღვინოზე უცხოეთში, ასევე უცხოურ ღვინოზე საქართველოში. საბოლოო ჯამში ეს ყველაფერი დიდ როლს ითამაშებს, რომ საქართველოს ცნობადობა საერთაშორისო მასშტაბით გაიზარდოს და კიდევ მეტად დავიმკვიდროთ თავი მეღვინეობის საერთაშორისო რუკაზე”.
"ღვინის კლუბი" და ვებგვერდი Vinoge.com ვულოცავთ საბას გამარჯვებას.
© ღვინის კლუბი/vinoge.com
ბეჭდვა
თქვენი კომენტარი